Aṭas n wawal i d-yellan deg tallit-agi n ukman, ama ɣef waṭṭan n Covid-19, ama ɣef tnefsit n umdan d wamek i ttidiren tagnit-agi tamaynut i d-yella deg umaḍal s umata. Ɣef wanect-a,dɣa, i nesteqsa Dr Mahmoud Boudarène. Ha-tt-an tririt-is.
‘’Akman d ttawil agejdan i useḥbiber ɣef unṭaḍ n waṭṭan Coronavirus. S wakka i yezmer umdan ad yeḍmen tazmert-is, ad yesseḥbiber ɛad ɣef terwiḥt-is. Seg tama-agi, ulac yakk ayen i t-yugaren deg wazal yesɛa ukman-agi. Yerna, ula deg Remḍan, ur d-yelli ara d aɛewwiq i yimdanen. Yella ciṭ kan n uɣilif imi ulac timliliyin-nni n twacult deg waggur-a. Ula d tamsalt-a, teḍḥa-d dayen yelhan i wakken ad yenqes unṭaḍ n waṭṭan-a. Ma d lɛid, xas ur mɣafaren ara yimdanen, maca llan ttawilat atraren tura, yecban iẓeḍwa inmettiyen d wayen-nniḍen swayes i zemren yinselmen ad mɣafaren imi ula d lislam yezmer ad yeddu d lweqt-is i wakken ad yesseḥbiber ɣef terwiḥin. Yerna ma nwala ɣer yiseggasen iɛeddan, ad naf aṭas n twaculin i yessexdamen ttawilat-agi atraren n yiẓeḍwa inmettiyen d tilifun i wakken ad ssiwḍen slam i yiɛeggalen-nsen yellan berra n tmurt. Ɣef waya, ilaq ɣef umdan ad yezwir kan leɛqel ɣef yiḥulfan, axater d tallit ara iɛeddin akken yebɣu yili lḥal. Ma ɣef wayen swayes i yezmer ad d-yeglu ukman-a, ad naf deg tazwara lxiq n umdan, kra n cwal deg twacult, lexsas deg tgella akked ttawilat n tdamsa. Yezmer ad yessiweḍ kra ɣer twaɣit tameqqrant yecban axrab n leɛqel ma yella bab-is ur iduwara neɣ ur yufi ara afus n tallelt. Aya, ɣer kra kan n yimdanen, mačči ɣer medden irkelli. Ma kra-nniḍen, yella-d ukman-a d tagnit i asen-yesmeɣren deg ccan-nsen i wakken ad tteklen ɣef yiman-nsen. D tagnit anda steqsan ɣef wazal n tudert-nsen akked unamek ara as-fken sya d afella. Mebla ma nettu akud sɛeddan akked tɣuri, taẓuri akked wayen yakk ḥemmlen’’.
Hocine Moula