Ṭṭuqtent tlufa n tmenɣit deg wussan-agi ineggura deg tmurt. Dɣa deg wass n Lεid tamezyant iεeddan, i d-yellan deg ttlata iεeddan, 4 deg waggur n yulyu 2019, yettwanɣa yiwen ilemẓi (H. M.) yessεan 40 n yiseggasen deg leεmer-is. Yezdeɣ yilemẓi-agi yettwanɣan ɣef lewhi n tmeddit deg taddart n Iḥddaden, yetabaεen ɣer tɣiwant n Mεatqa.
Ɣaf leḥsab n yisallen n yimezdaɣ yellan deg umḍiq anda yettwanɣa ilemẓi, tella-d twaɣit seld cwal i d-yellan gar sin n yidisan ɣef temsal ur nesεi ara yakk azal, maca (S. D.) yellan yettidir deg tmurt n Marikan, i ihelken deg walaɣ-is (yedderwec) ɣef leḥsab dima n yisallen n yimezdaɣ n temḍiqt-agi, yeddem-d lmus, u yefka ugar n kraḍ n tyitiwin s aεebuḍ d unegzum n yiẓewran n yifassen n yilemẓi i yeẓlen,sakin, deg temda n yidammen.
Sdat n talluft yecban d tagi, sawḍen yiɣallen n usellek ilemẓi ɣer uxxam n ttujya u llin srabes n yisertiyen yiwen n tsestent akken ad ẓren sebba n twaɣit-agi. Yeǧǧa-d yilemzi yettwanɣan tawaccult-is d warraw-is d igujilen, dɣa ula d imezdaɣ n tɣiwant n Mεatqa, ggran-d deg leḥzen meqqren, imi ilemẓi-agi, yella d win yezεan azal-is deg tmetti, yettqadaren aṭas, yetturba, ɣef leḥsab n yisallen n yimezdaɣ. Taluft-agi mačči d tamezwarut deg temḍiqt-agi n Leqbayel.
Dɣa deg waggur n Remḍan iεeddan, yiwet n tlemẓit n taddart n Iqubaεen, tettwanɣa deg uxxam-is s anda tezweǧ deg taddart n Carfa n Bahlul, deg Dayra n Iεzugen. Ɣef leḥsab n yisallen n srabes n laman, tilemzit-a, tenɣa-tt uletma-s n urgaz-is s tallelt n twacult-is d urgaz-is. Wwin srabes n laman tlata n yiεeggalen n twacult-agi ɣer lḥebs: argaz n tlemẓit, yemma-s d uletma-s. Akka, ssuturen yimawlan n tlemẓit deg teɣdemt, ad nadin ugar deg taluft, aṭas n temsal i mazal urεad frint.
Ali Zalouk