Wissen ma yella d lexṣaṣ n leεqel ɣur wid inehhṛen? Neɣ ahat d tamussni n yiṣuḍaf n tnehhart i ten-ixuṣṣen ? Ama d tamentilt tamezwarut neɣ d tis snat, ayagi yerra iberdan d annaren n yisehwa i yettawin tirwiḥin n medden yal ass.
Dɣa, deg useggas n 2019 kan, ɣef leḥsab n ulɣu i aɣ-d-yewḍen sɣuṛ Uḥuddu aɣarim n Bgayet, ḍṛan 727 n yisehwa di twilayt n Bgayet, anda mmuten 20 deg-sen u jeṛḥen 872 n yimdanen, deg 5 n wayyuren. Imḍanen-a, d wid yessexlaεen, ladɣa imi deg wayyur n remḍan i yiman-is, iqeddacen n Uḥuddu aɣarim, gren iman-nsen deg 159 n yisehwa, deg yineggura-a, jeṛḥen 195 n yimdanen. Xas ma yella ulac wid yemmuten, lameεna amḍan n useggas-a, yugar win n useggas n 2018 ideg ḍṛan 119 n yisehwa. Rnu ɣer waya, deg semmus n wussan imezwura n yunyu 2019, jeṛḥen 45 n yimdanen, yemmut yiwen.
Ma yella deg sin n wussan n lεid, 20 n yisehwa i yeḍṛan, jeṛḥen 34 n yimdanen, yiwen yemmut deg usehwu n umuṭu deg umkan iwumu qqaṛen 4 n yiberdan (4 chemins ). Seg tama-nniḍen, deg teftist n Cap Carbon yemmut wayeḍ n yilemẓi, i d-yettneggizen seg yiblaḍen yeεlayen azal n 30 lmitrat ɣef yilel. Di taggara, nezmer ad d-nini d akken, rnu i tmentilin n yisehwa-a i d-nebder yakan, ula d addad n yiberdan diri-t maḍi, ihi ula d imḍebbṛen n tmurt cerken deg yixeṣṣaṛen i iḍeṛṛun deg-sen.
K. K.