Ulamma akayad n bakalurya ileddi s wudem unsib tiwwura n uxeddim deg yimal, mačči ala netta i d-yettakken di tallit-a tisura n wayen iɣef ttnadin yilemẓiyen d tlemẓiyen. Acḥal i d-yeffɣen si tesdawit s turagt neɣ s magister, ttganin amḍiq n umahil ulac, d wacḥal i ibeddlen tarrayt, smurrsen, ufan axeddim ara asen-iḍemnen tameddurt. Dɣa, di tallit-a, ɣas llant twuriwin ala s bakalurya i tzemreḍ ad tent-teṭṭfeḍ, am tesnujjya, llant waṭas ideg ilaq-ak kan ad tesɛeddiḍ asileɣ, neɣ d tannant, ad tesbeyyneḍ tizemmar d teẓwer deg taɣult-nni ideg tegreḍ.
S umata, ama ɣezzif usileɣ deg wakud neɣ uhu, ttilin-d yisilaɣ ɣef ddeqs n twuriwin ideg yewwi-d ɣef yilemẓi ad yessin amaḍal n tsenselkimt, tutlayin tiberranin, leḥsabat (ciṭuḥ si tusnakt), akked tmussni n teywalt neɣ n umeslay. Wa d amedya ɣef yisilaɣ i iɛummen akka tura, ama deg Unammas n usileɣ aɣelnaw neɣ anda-nniḍen, ufan deg-sen yilemẓiyen asellak seld aṭas n yiseggasen war axeddim. Amedya n Bgayet, si tikkelt ɣer tayeḍ, leddin yimḍebbren n tkebbunay isilaɣ ɣef win ara yeṭṭfen kra di lecɣal n uselkim, ama d leḥsabat neɣ d amesbad n tnazalin d tewlafin. Rnu-as ɣef win ara yilin d amasgad. Deg umaḍal n tutlayin, ttilin yisilaɣ ɣef umesnubgat n usensu, ɣef uneɣmas neɣ ɣef umsuɣel si tutlayt ɣer tayeḍ.
Ṭṭuqqten yisilaɣ-nniḍen i yettmaggan di tallit-a n tetiknulujit, ama ɣef umekfaḍu di rradyu neɣ win ara yesselḥayen isebtar d yidigan web n tkebbaniyin timeqqranin. War ma nemmeslay ɣef internet i yellan d amaḍal n uxeddim, ɣas ulamma ugur n uceyyeɛ d tuṭṭfa n tedrimt s ttawil n internet mazal inuḥ di Lezzayer. « Sɛeddiɣ akayad n bakalurya kraḍ n tikkal, ur t-id-wwiɣ ara. Dɣa, xedmeɣ asileɣ ad kecmeɣ takebbanit. Ass-a ufiɣ iman-iw, ttwaxellaseɣ akken ilaq », i aɣ-d-yenna yiwen n yilemẓi.
M. K.