Teḍra teqsidt, aggur iɛeddan, deg uɣerbaz agraɣlan azayri di tmanaɣt n tmurt n Fransa, mi teffeɣ yiwet n tnelmad seg uɣerbaz akken ad tẓal. Syin, tettwaḥbes ɣef leqraya i wazal n 7 n wussan sɣur tanemhalt n uɣerbaz, Massa Nadya Messasi. Mbaɛd tadyant-a, tegdel tnemhalt taẓallit i yinelmaden,i yiselmaden akked yixeddamen deg uɣerbaz.
Ddurt iɛeddan, temmeslay-d tneɣlaft n ttrebga Mass Nuriya Ben Ɣebrit ɣef wanect-a , tenna-d : “Ttruḥun-d yinelmaden ɣer uɣerbaz akken ad lemden timussniwin, ma yella d taẓallit, ad tili deg uxxam mačči deg uɣrbaz ‘’. Anect-a d ayen i d-ixelqen aṭas n wawal, ladɣa gar wid yessexdamen iẓedwa n internet : Gar wid iwumi yeɛjeb rray-agi, nnan-d d ayen yelhan limer ur nesekcam ara dyana deg yiɣerbazen. Si tama-nniḍen, llan wid i yugin rray-agi .
Aṭas n wawal i yuzlen sya u sya. Aṭas n wid ur neqqbil ara rray-agi. Ad d-nesmekti kan d akken aṭas n yizzayriyen ur nebɣi ara taneɣlaft n usedwel. Yal tikkelt, senqaden-tt di laryuy-is, ladɣa deg wayen yeɛnan ddin. Si tama-nniḍen, llan sandicat i d-yeskecmen iman-nsen, ula d nutni ffkan-d rray-nsen. Gar-asen Mesɛud Budiba s yisem n CNAPEST i d-yenna d akken ‘’taneɣlaft n ttrebga ur ilaq ara ad d-ffeɣ s rray yecban-wagi, ladɣa imi tamurt-nneɣ tleḥḥu ɣer tefranin, d ayen i d-yeglan s waṭas n wawal. Ikemmel, yerna-d: ‘’Ur ilaq ara ad nessekcem tasertit d wayen-nniḍen ɣer taɣult n ttrebga’’. Gar wa d wayeḍ : Wiss ma yella yiswi n uɣerbaz i tmussni neɣ i wayen-nniḍen?.
Y. S .