Accueil Tamazight Iziran n temẓi n Fahim Messaoudene

Ajdid deg tira

Iziran n temẓi n Fahim Messaoudene

149

Ussan-agi kan iɛeddan i d-yeffeɣ, ɣer Tezrigin Ccix Muḥend Ulḥusin, udlis Iziran n temẓi n Fahim Messaoudene. Deg udlis-a i d-ihegga umyaru i warrac imecṭaḥ, ad naf deg-s tullisin, tineqqisin akked yiḍrisen. Ha-t-an ciṭ n wayen i d-yuran deg usebtar wis 4 n tduli. “Inelmaden, kkren s uẓẓu n yisekla d yiselmaden-nsen, wa yeqqaz, wa iteẓẓu…Deg uzniq, imdanen ur d-cqin ara deg twennaḍt i deg ttidiren. Abrid yeččur d tiqraɛtin, icekkaren d lekwaɣeḍ…Inelmaden, walan, yiwen urgaz yečča tabanant, dɣa, iḍegger ticlemt-ines ɣer lqaɛa.

Tluɛa-t Tziri, tenna-as: “A Mass, ayen i tḍeggreḍ ticlemt n tbanant ɣer lqaɛa? Ayen i tessamaseḍ tawennaḍt-nneɣ? Ur teẓriḍ ara belli yezmer ad tesseɣli albaɛḍ deg-neɣ ma yukel fell-as! Muqel kan ma tettwaliḍ iḍumman di lqaɛa, tawennaḍt n uɣerbaz-nneɣ zeddiget”. Yenna-as Uɣilas: “Deg uɣerbaz-nneɣ, yal tiɣmert nessers tanefsrast. Nekni, yal ass nleqqeḍ lekwaɣeḍ deg uzniq. Aselmad-nneɣ, yenna-aɣ-d ur ilaq ara ad nessamas tawennaḍt i deg nettidir”. Din din, argaz-nni yeddem ticlemt-nni ɣer tnefrast, yenna-asen: “Surfet-iyi ay arrac uḥricen”.

D tukkist seg uḍris i yettawin azal meqqren, i d-yemmalen tarrayt s wayes i yezmer umdan ad irebbi igerdan ɣef useḥbiber n ugama. Aselmed, yettili-d s tigawt, mačči s tmenna kan. Wid yebɣan ad d-aɣen adlis-a, ilaq-asen kan ad rǧun kra n wussan sya ara yaweḍ tinedlisin, ɣef wakken i t-id-iwekked yimḍebber n Tezrigin Ccix Muḥend Ulḥusin, Mass Gemmar Mbarek, deg uɣrab-is n Facebook. Fahim Messaouden, d amedyaz u d aneggal s teqbaylit.

Yesɛa agerdas n DEUA di tliktrunit. Yella yakan d aselmad deg uɣerbaz n lḥirfat. Yeqdec aṭas deg umussu adelsan. Yura tamezgunt “Ar melmi ara idum waya?”, deg useggas 1999. D aneɣmas, diɣ, ama deg rradyu Numidya n Kanada, ama deg yiɣmisen n La Dépêche de Kabylie akked La Cité. Yura ula deg tesɣunt Aselmad. Yewwi arraz n Muḥemmed Dib s wungal-is Anza. Am wakken i t-id-iṣaḥ umekkan wis sin deg umsizwer uzzig Dda Lwennas n wungalen Asdawan, Iḥulfan d Imehbal s uḍris-is “Ay izem”.

Hocine Moula