Aṭas n yimagdayen i yeɣlin d iseflan ɣef tugdut, tilelli d tmaziɣt mgal tebrek n yimaεfan yessexsayen itran, gar-asen ad naf Kamel Amzal neɣ Maǧid At waεmar. Ilul Kamel Amzal ass n, 13 deg tuber 1962, deg Tifeṛḍuḍ, d anelmad deg uɣerbaz amenzu n taddart d uɣerbaz alemmas Ɛmar At Ccix d tesnawit n Mustafa Ben Bulεid deg Ɛin Lḥemmam. Seg yimeɣnasen iqedcen i tefsut n yimaziɣen n 1980 ? Xas yell meẓẓi, maca yegza azal n tegdut i yiɣerfan.
Ad yelmed tasbenyulit deg Ben Ɛeknun deg useggas n 1981 seld mi d-yewwi akayad BAC n tsekla d tfelsafit. Anelmad amagday azelmaḍ n tektiwin, ur yeεǧib ara i yimṭuṛfa inselmen i yesserkan tasdawit s yilefdan n wallaɣ-nsen ur nessin tafat, tugdut neɣ tilelli n wawal, dɣa ttgallan deg mmi-s n Tiferḍud akken ur d-yeslalay ara amazday imani ara yeldin tawwurt n uskasi i yinelmaden s tallelt n yimeɣnasen am Mustafa Baca d Cawqi Ṣalḥi. Srusen-d tbratin n ugali ddaw tewwurt n texxamt n Kamel, am tin yufa iḍ n umenzu n unbir deg-s ggulen ad yettwanɣa, iḍ-nni ara yaru asefru-ines aneggaru :
‘’Ay axettar ! Acḥal n iseggasen iεeddan ur zriɣ,
Neɣ nezga nettwaɣ si ddunit-agi.
Ɣef εecrin i teǧǧuǧug ddunit, εecrin !
Nekk di leεmer-agi, ɣliɣ d amɣar
Temɣar-iw, tezwar-d temzi…
I wacu ara ttruɣ neɣ lummeɣ lmektub
Imi zriɣ tedduɣ ɣer lmut’’.
Ilemzi, ur d-as-d-yecqi ara imi yekker s yiswi n uslali n umazday imani s uεellaq n wulɣu i d-yessawalen ɣer unejmuε amatu, syin teẓḍem-d terbaεt s yijenwiyen, wwten aqcic ur yesεin, gar yifassen-is siwa ixef n lkaɣed, s ijenwiyen ara yentun deg tεebbuḍt n Kamel. Xas akka, imaṭṛfan, ur tt-qqiden ara imi ẓẓlen aqcic di lqaεa, kksen-as tablust, ssentan-as ajenwi di tεebbut-is. Ad yettwaṭṭef Lassuli Fateḥ Ellah ɣer lḥebs i tmenɣiwt n Kamel, maca ad yeffeɣ seld 4 n yiseggasen s leεfu n Cadli Ben Ben Ǧdid. Aṭas n tejmilin i yuɣalen i uqcic n Tifeṛḍuḍ am tezlit n Uleḥlu d tin n tsekkrin n tarbaεt n ccna taddart n Tifeṛḍuḍ :
‘’Γas akken lmut-ik tejreḥ-aɣ tasa
yeǧǧuǧeg yisem-ik yuɣ akk timura
s tafat n tikti-k, nufa tisura
ddmen rruḥ-ik ur d-ak nɣin ara
ɣer ugdud isem-ik yeqqim-d i lebda’’
Kamel Amzal ad yeqqqim d azamul n umennuɣ i yinelmaden imagdayen mgal tuddsiwin n ṭṭlam.
Tigrine Nisma