S tallelt akked tddukka « Tadukkli » n Ayt Ɛisa, thegga-d tddukkla Projetc’heurts n Bgayet kra seg wahil n temlilit tasinimatugrafit tis 17 deg Umezgun n tizzegzewt n Buṭeɣwa, i d-yellan seg 22 ar 25 n wayyur-a n cutember ideg nella. I tikkelt tamezwarut ihi ara yilint temliliyin-a n usenɛet n yisura deg taddart n Ayt Ɛisa, taɣiwant n Uweqqas. Ad d-nesmekti d akken ula di Bgayet yella-d usenɛet n umur-nniḍen n yisura timeddiyin, am yal aseggas.
Gar yisura i d-yettwasneɛten din ɣef teɣzi n kraḍ n wuḍan, yella-d yiwen, ass n acer 22 cutember, s uzwel n « Amussu ». Sin-nniḍen azekka-nni ɣef 19:00 s uzwel n “Nnuba“ akked « A Ǧamila ini-d lemmer ad mmteɣ amek ara txedmeḍ ». Yella-d daɣen wayeḍ ass n aram isem-is » A Mensura, tebḍiḍ-aɣ « . Ugar n usenɛet n yisura d uskasi akked uzayez di taggara n yal asaru, yella uheggi n yiwen n uḥanu. Ɣef wawal n yimheggiyen idiganen n uneḍruy-a, ulamma ɛeddant temliliyin-a di tegnatin igerrzen, wanag mačči aṭas n lɣaci i yusan ad walin isura-a deg ubraḥ n umezgun, ma nga aserwes ɣer mi ara tili d taceqquft n umezgun ara d-yettwasneɛten.
« Ar tura, ttmesteqsayeɣ acuɣer mačči aṭas n medden i d-yerzan ad nezzhen isura-a i lmend n temliliyin tisinimatugrafin di Buṭeɣwa. Ula d imezdaɣ n Ayt Ɛisa ulac-iten amek uɣen tannumi ttasen-d i uḍfar n tceqqufin n umezgun. Nekk s timmad-iw, rǧiɣ ugar n 200 n yimdanen, i aɣ-d-yenna Mass Brahim Ǧabri, amaray amatu n tddukkla « Tadukkli » n Ayt Ɛisa.
M. K.