Ur miden ara sin n yiseggasen segmi d-ilul uxxam n teẓrigin Ccix Muḥend Ulḥusin ɣef uqerruyis akka tura amedyaz Mbarek Gamar, yessaweḍ yessaẓreg-d 21 n yidlisen s tewsatin yemgaraden. Ɣef yisem n umussnaw-a i yefka dɣa i teẓrigin-is, yenna-aɣ-d umasay-is d tajmilt i umdan, d izen ɣef teqbaylit. Ayen yessefraḥen ahat ugar d amḍan n yidlisen i yessaweḍ uxxam-a ad d-yessiẓreg deg 20 wayyuren kan, ulamma d abujad deg unnar, rnu s drus n ttawilat.
Daɣen, ad dnesmekti belli ar tura, akken ma llan uran s tutlayt taqbaylit war ma yella-d kra s tutlayt tajenṭaḍt, gar wungalen, ammuden n tullisin d wid n yisefra. Ulamma weɛrit ayendin liḥala n udlis aqbayli deg ulzuz, qazmen yimḍebbren n teẓrigin-a tamara, fkan afus i waṭas n yilemẓiyen i dyesnulfuyen di tsekla. Tuget segsen i tikkelt tamenzut i dsuffɣen d adlis ayen akken uran. D acu, dima ɣef wawal n yimḍebber-is, sɛan kra n wuguren n usuzzer ɣer yimeḍqan akk anda ttrusun yidlisen, abeɛda tinedlisin. Yiwet, ulac aṭas n yimdanen i yettaɣen seg tnedlisin, tayeḍ ur llin merra at tnedlisin d wid iteṭṭfen deg wawal ɣef uxelles n udlis mi ara yenz.
Neɣ s wawal-nniḍen, zgan ssewɛaren tilufa ɣef yimaẓragen i asenyesselḥaqen adlis aqbayli. « Amḍan n yidlisen i nesɛa ires ɣur-neɣ, yugar win i yellan di tnedlisin », i d-yenna bab n teẓrigin-a. Ma yella d ayen i zemren ad rǧun yimeɣriyen d yineḍfaren n teẓrigin Ccix Muḥend Ulḥusin i yimalasen i d-iteddun, heyyan akka tura 11 n yidlisen s tezwawt i usiẓreg, gar-asen isefra, ticeqqufin n umezgun, tullisin, ungalen d tewsatin tiyaḍ.
M. K.