Ixus ayendin wayen ara yesnernin aḥric n teywalt aqbayli, neɣ amaziɣ s umata. Deg wayen iɛeddan, ḥettmen-d wiyaḍ tutlayin tiwerdanin, yesnulfa-d uwanek aṭas n wallalen n teywalt d usiweḍ n yisallen war ma yefka amur-nsent i tutlayin timaziɣin i yellan di Lezzayer.
Armi i d-yusa dɣa umaynut i Yimaziɣen n Tmazɣa merra mi d-yesnulfa Mass Muḥemmed Saɛdi agraw n BRTV deg useggas n 2000, s tallelt n tuget n Yiqbayliyen i yekkin s tedrimt deg ussider-is. Kra n yiseggasen aredqal, yesbedd-d udabu TV4 ur nettqenniɛ ar ass-a. Syinna, iseggasen-a ineggura abeɛda, nnulfant-d tregwa-nniḍen, ɣas s drus n ttawilat, am TQ5, Taqvaylit TV, Arrac TV d Addal TV.
Ugar n tregwa-a, yezmer lḥal ad d-tlal terga-nniḍen ayyuren-a i d-iteddun ɣef wawal n Mass Muḥend Amalul, amekfaḍu aqbur n BRTV. Wid ara yilin deffir usenfar-a n terga azarts TV d Massen Lɛerbi Crif Ɛebderzaq akked Taher Yami. Aya, d Mass Ɛebderzaq i t-id-yuran deg uẓeṭṭa inmetti n Facebook. Ad d-nesmekti d akken, ɣef wayen yerzan allalen imezwura n uxeddim, tesɛa yakan terga-a ddeqs seg-sen. Ula d irupurtajen tga yakan akked waṭas n yimura, tugart tugart ɣef yidles.
Ayen yerzan tutlayt swayes ara tessawaḍ terga-a, ad tili d taqbaylit, maca ma yella di Fransa ara tettwasbedd, ahat yettḥettim-d usaḍuf n tmurt-a aseqdec n tefransist ɣef yakk tiregwa n tiliẓri i d-yennulfan din. Aredmani, yeqqim-d tura ad d-yennerni usenfar, syin ɣer-s ad d-ibin ma ad tili deg ugensa s zzirban, neɣ alamma i d-telḥa kra n umecwar di internet. «D ayen yelhan ma ad d-ternu terga-nniḍen taqbaylit i tid i nesɛa akka tura. Nessaram ad d-tawi timerna i lasel, tutlayt d yidles», i d-yenna yiwen n yilemẓi.
M. K.