Seg tmettant n Naïma, tɛeddiḍ akkin ɣer tin n Nour, Ferhat Chelmouni/Ferhat Ait Mohend, Akli d wiyaḍ alamma d Mohamed Nait Challal, acḥal d aselmad n tmaziɣt i iruḥen kan akka deg tazwara neɣ deg tlemmast n umecwar-nsen. Amur ameqqran deg-sen, llan d iselmaden imezwura i yeskecmen tamaziɣt ɣer uɣerbaz deg useggas n 1995, mbeɛd aɣunzu n uɣerbaz i wazal n tmanya n wagguren (aseggas aɣurbiz 1994/1995). Dɣa, deg terbaɛt-agi tamezwarut i yella Mohamed Nait Challal iwumi ssawalen yimeddukkal-is Mohand Atregi imi yettutlay tatergit akken iwata. Yeselmed tamaziɣt deg uɣerbaz azzayri armi d aseggas n 2 000. Xas ulamma yunag ɣer tmurt n Fransa, maca ikemmel yeselmad tamaziɣt dinna i warraw n yiɣriben imaziɣen deg waṭas n tddukkliwin.
Ɣer tama n umennuɣ-is ɣef tmagit-is, idles-is akked tutlayt-is, yella diɣ deg uḥric n tsertit anda yettnaɣ ɣef tugdut akked yizerfan n umdan. Akka dɣa i yella d ameɣnas n RCD seg yiseggasen 1990 netta d yimeddukkal-is n tama-nni n Bachdjerrah deg Lezzayer tamanaɣt. Ɣer taggara-agi, u xas akken yettban-d yuḍen, meɛna yezga deg tmesbaniyin i ixeddem Umussu azzayri deg tmurt n Fransa. Yelḥa deg tikliwin i d-yettwaheggan i lmend n waya. Yedda s trrugza d tebɣest armi i t-teḥweṣ tmettan ass n, 13 ɣuct 2020, deg leɛmer-is 63 n yiseggasen. D tamettan iɣef ur bnin yimeddukkal-is imi ur yeǧǧi ara aṭṭan n uxenzir n yidmaren ad yeseɣleb fell-as. Ur yeǧǧi ara aṭṭan-a, ad t-yesefcel u ad t-yeǧǧ deg tesga. Yeseɣleb fell-as armi dayen tɛedda nnig n yiɣil-is. Am wakka, mi ara nwali amek i as-rran tajmilt wid i t-yesnen, ama d iselmaden n tmaziɣt, ama d imeddukkal-is neɣ ɛad imdanen kan akka, nezmer ad d-nini belli yemmut i wakken ad yedder i lebda, xas ulamma yemḍel ass-nni n lǧemɛa, 21 deg ɣuct 2020, deg taddart-is Taqaɛet, tama n Sedduq. Sgunfu deg talwit ay ameɣnas.
H.M.