Segmi yebda useggas aɣurbiz 2018/2019, ttcetkin yinelmaden n tɣiwant n At Smaεel akked yibabaten-nsen seg lexsas n ttawilat n usiwed n yinelmaden ɣer yiɣerbazen. Ladɣa wid yeqqaṛen deg tsenawit imi, taneggarut-a, teggug ɣef kra n tuddar n tɣiwant. Amedya d taddart n At Tεisiwt i ibeεεden azal n sin n yikilumitṛen ɣef tɣiwant. Taddart-a, ttunefken-as sin n lkiṛan iɣurbizen, i yeṣṣawaden snat n tikkal mkul tanezzayt. Lameεna, ayagi drus nezzeh ma yella nmuqel acḥal n yinelmaden i tesεa. Rnu i waya, ula d inelmaden n uɣerbaz alemmas, ttanin ( rrekben) dinna. D ayen i yeǧǧan lkiṛan-a ur d-keffun ara i uzgen deg-sen. Dɣa, llan deg-sen wid yettruḥun ɣef uḍaṛ, xas ma yella asemmiḍ igezzem, ma yella d wiyaḍ, ttaṭṭafen ttawilat-nniḍen n tumnayt, yerna akken-nni ur ttelḥaqen ara deg lawan.
Ihi s unamek-nniḍen, teḥṛeṣ ddeεwa mliḥ deg usenfaṛ-a n tumnayt taɣurbizt. Lameεna akken qqaṛen, yal ccedda, tettabaε-itt talwit, Imi, ugar n waṭas n wakud n uraju, yettunefk-as-d i tɣiwant-a n At Smaεel lkaṛ d amaynut, i d-yettwanernan i wiyaḍ yellan yakan. Aselway n tɣiwant, i yettidiren ula d netta taswiεt-a n ddiq, imi d netta i d imḍebbeṛ n tɣiwant, yerna aṭas n yimezdaɣ i yettcektin seg waya, yumer ayendin s waya. Dɣa yenna-d : « Lkaṛ-a, yusa-d deg lawan-is, acku arrac-nneɣ ḥwaǧen-t i wakken ad yenqes leḥriṣ fell-asen, ladɣa wid n tneɣriyin tineggura, imi, ur asen-d-yeggri ara aṭas i wakken ad sεeddin ikayaden n BEM akked BAC. Ihi, taɣiwant n At Smaεel, ad asen-tessewjed akk ayen ilaqen i wakken ad smurrsen ».
K. K.