Lfen d azwel n album amezwaru n ucennay ilemẓi Mohand Améziane Moula. Yeffeɣ-d deg ussan iɛeddan ɣer tezrigin Studio Irath. Deg-s sebɛa (7) n tezlatin anda i d-yessefra s ccna unaẓur Améziane ɣef kra n yisental i yerzan timetti s umata, ladɣa, tahri akked tejmilt. Akken ma llant tezlatin-agi, d ayla n ucennay, ama d tameyazt neɣ aẓawan. «Cennuɣ iḥulfan-iw. Kra din yekka-d srid seg wul-iw. Ayen yakk i d-nniɣ, ɣur-s assaɣ akked tmetti». Akka i aɣ-d-yenna Mohand Améziane Moula mi i t-nesteqsa ɣef yiḍrisen-is.
Ma ɣef wayen yerzan aẓawan-is, zyada ɣef wayen i d-yegmer ɣer yicennayen imeqqranen, yecban Slimane Azem, Ait menguellet, Matoub… akked wulmud n uẓawan deg Uxxam n yidles Mulud Mɛemmri n temdin n Tizi Uzzu, ad naf aṭas n tecraḍ-is deg tezlatin-agi timaynutin. “Nessaram ad nili di lebɣi n wid ara aɣ-yeslen, u ad nawi abrid n yimezwura-nneɣ”, i ikemmel yenna-d ucennay-agi ilemẓi, xas ulamma iwala d akken ccna aqbayli yebda yettmili u “iteffeɣ i ubrid, sya ɣer da”. I wid yebɣan ad slen aẓawan aḥlawan n teqbaylit d isefra zeddigen, yezmer ad yessemḥes, ihi, i sebɛa n tezlatin-agi n album n Mohand Améziane Moula: Lehlak-iw, Tayri-m, Tajmilt, Uzzu n tasa, Itbir, Lfen akked yiwet s uẓawan kan Intrumental. Ilul Mohand Améziane Moula ass n, 30-6- 1984 deg taddart Tiɣilt Lḥaǧ Ali, deg tama n Wat Yiraten.
H. M.