Accueil Tamazight Llan-d kra n wuguren

Akayad n BAC deg Wehran

Llan-d kra n wuguren

26

Ɣas yezri ukayad n BAC deg tegnatin igerrzen deg tuget n wammasen n usɛeddi deg twilayt n Wehran. Maca llan-d kra n wuguren, ɣas mačči d imeqqranen, maca sneqsen almes (concentration) ɣef waṭas n yinelmaden i iḍefren timsirin-nsen akken ilaq ɣef teɣzi n useggas.

Gar wuguren-a, ad d-nebder amqelleɛ i d-yellan gar kra n yinelmaden d ucqirrew n yiselmaden i ten-iɛussen deg tneɣrit. Yiwen seg yinelmaden-a, yessaweḍ yerẓa ddjaj n ṭṭaq n tneɣrit deg wass amenzu d wass wis kraḍ, acku iselmaden i t-iɛussen ur t-ǧǧin ara ad yexdem lebɣi-s.

Azekka-nni, yusa-d unemhal n usegmi n Wehran ɣer wammas-a, ur yessaweḍ ara ad yessers tilufa, acku kra n yinelmaden kemmlen deg leɛyaḍ. Annect-a yeḍra-d deg wammas n Cerraṭ Ḥmed deg Ɛin Tturk. Mi nesteqsa inelmaden-nniḍen yeqqaren d wigi iɛerḍen ad sxerben u ad xedmen ccwal, nnan-aɣ-d belli “ur ɣrin ara aseggas kamel, usan-d imir-a deg kraḍ n wussan, bɣan ad d-ḥellin akayad-a”.

D tigawin am ti i d-yessebganen aṣubbu n uswir n ulmud deg uɣerbaz Azzayri, acku ula d akayad meqqren yecban win n BAC, truḥ-as lbenna-s. Ɣer taggara, ad d-nini daɣen ula d iselmaden begnen-d kra n lɣiḍ ɣef snat n tlufa. Tamezwarut, ttemlilin-d uguren deg berra sɣur kra n yinelmaden.

Tis snat, d addad ur nelhi ara n tuččit i asen-d-fkan di leftur, acku tettas-d akken semmḍet, rnu tidersi n tgella i d-ttaṭṭafen. Ɣef waya, ssutren aɛiwed n tmuɣli deg tɣawsiwin am ti, ɣas ur sɛint ara azal d ameqqran, maca ttɛawanent akken ur yettṣubbu ara uswir ugar.
Khaled Achoui.