Accueil Tamazight Llint snat n tzeɣwa n uselmed n yimeεḍar

Souk El Tenine

Llint snat n tzeɣwa n uselmed n yimeεḍar

44

Mbeεd lḥif d lmerta i idummen ugar n εecra n yiseggasen, anda ttawin imawlan arraw-nsen imeεḍar seg Dayra n Mεatqa ɣer uɣerbez uslig n tɣiwant n Boukhelfa, deg tamdint n Tizi Uzzu, tettunefk-as-d i tddukkla Itran snat n tzaɣwa n uselmed deg uɣerbaz n Muḥemmed Miludi deg taddart n Tiɣilt Maḥmud, yettabaεen ɣer tɣiwant n Ssuk El Tenin deg dayra n Mεatqa.

Ferḥen nezzeh yimawlan n yimeεḍar s tigawt-agi i d-yezgan deg lmendad n uselmed. Sya ara siwḍen yimḍebbren n tɣiwan ɣer wayen waεden yis-s, s lebni n yiwen n uɣerbaz yettwaxseṣen i taggayt-agi n yinelmaden meεḍuren n temḍiqt-agi n Mεatqa. Dɣa, ɣef leḥsab n yimḍebbren n tddukkla n yimawlan n imeεḍar Itran, d Tanmehla n temsal timazdayin (DAS) i d-yefkan ttesriḥ i uselmed n yigerden deg tzeɣwa n uɣerbaz-agi.

Ihi, d taεkemt meqqren i yettwakksen ɣef yimeεḍar d imawlan-nsen, i yezgan deg lmerta seg 6h n tsebḥit, akken ad awḍen zik ɣer uɣerbaz uslig n Buxalfa. Ugar n 36 n yinelmaden imeεḍar i yettwajerden yakan deg uɣerbaz-agi amaynut, ɣef leḥsab n uselway n tɣiwant n Ssuk El Tenin Mass Khermous Slimane. Llan ugar n 100 n yimeɛḍar i tesεa Dayra n Mεatqa d tɣiwanin yecban Tirmitin, At Zmenzer, Amecras. Kra deg-sen, mazal urεad ttwajerden deg uɣerbaz. Yewɛed yimḍebber amezwaru n tɣiwant n Sukk El Tenin s ufus n tallelt s wayen akk yezmer i yinalmaden imeεḍar.

Am waken, diɣ, yewɛed s usewjed n yiwen ulemmas n uselmed n yimeεḍar s lebɣi n lwali n Tizi Uzzu deg yiseggasen i d-iteddun. Ferḥen aṭas yinelmaden s uɣerbaz-agi-nsen amaynut, i yesεan akk ttawilat iwatan akken ad ɣren deg-s deg tegnatin igerrzen. Dɣa, yewwi-d ɣef yimεelmen n temḍiqt-agi, ad fken afus n tallelt i tddukkla Itran akken ad tbedd ɣer tama n yimeεḍar-agi akken iwata lḥal.

Ali Zalouk