Accueil Tamazight Lmut n umeɣnas Ḥamid Ferḥi

Lmut n umeɣnas Ḥamid Ferḥi

138

S leḥzen meqqren i nemmuger lmut n yiwen gar wudmawen imagdayen i yettnaɣen ɣef yizerfan n umdan, d yiwen yettallen imeɣban d wid terra tmetti ɣer rrif. D yiwen seg wigad yebɣan ad beddlen udem i tsertit ɣer ubrid n tidet d win n ṣṣwab.

Ahat ad ilin wid ur t-nessin ara deg unnar aserti, imi yettnaḍaḥ di tsusmi. Wagi d Ḥamid Ferḥi, d asmideg, d amasay deg Umussu amagday inmetti (MDS), i yewwḍen leɛfu n Rebbi imalas-a. Ayen i yernan lɣiḍ di tmettant-is, d akken yuḍen kra n wussan uqbel ad yemmet, izad fell-as waṭṭan deg yiwen yiḍ, dɣa wwin-t s lɛejlan ɣer sbiṭar n Bni Messus di tmanaɣt, maca ayen yessewhamen, nnan-as-d ulamek ara tkecmeḍ imi ččurent texxamin.

Ayen i t-yeǧǧan ad yessezri iḍ-nni deg ugnir ɣef ukersi, yesbur yiwet n tḥayekt. Ahat d yiwet seg tmental yesɛejlen ussan-is, armi yewweḍ s anda ara naweḍ ass-nni n 5 deg furar. Ḥamid Ferḥi, yettekki deg waṭas n tmesbaniyin d yibeddiyen i d-yettilin mgal wid yettɛeddayen di ccreɛ deg lbaṭel.

D amedya-nniḍen n yir udem n ssbiṭarat n tmurt-nneɣ, d tewtilin yuɛren i ttafen din yimuḍan d ustehzi meqqren ur nesɛi tilas i swayes leḥḥun yixeddamen. Maca asteqsi ur nufi ara tiririt, ayɣer imasayen n tmurt, ttazzalen yal tikkelt ɣer tmura ideg tujjya telḥa u tuẓa isurifen meqqren akken ad dawin din? Ar melmi ara kemmlent tɣawsiwin-a d yir aselḥu n tsudwin d ustehzi deg yal taɣult? Ar melmi ara d-yili umuqel s tiṭ n lḥeq ɣer yimdanen yettruḥun d iseflan ur uklalen? Sya ar yimir, ad as-nessirem talwit d tmella i Mass Ḥamid Ferḥi.

K. A.