Accueil Tamazight ‘’Ma trebḥeḍ, nettekka, ma txesreḍ, d JSK’’

Talɣuɣa n Lezzayer n ddabex n uḍar, ASO (0-2) JSK

‘’Ma trebḥeḍ, nettekka, ma txesreḍ, d JSK’’

154

Yuɣal-d usirem i wid iḥemmlen s tidet tarbaɛt n yilmeẓyen n Leqbayel JSK mebɛed mi terbeḥ sdat n terbeɛt n ASO s sin yiswiyen ɣer ulac, yerna deg unnar n tneggarut-a. D tikkelt tamezwarut ara d-tawi JSK 3 tneqqidin s lekmal-nsent, ladɣa deg berra n Tizi Uzzu. S wakka ara tesfeḍ ciṭ lexsara-s n ddurt iɛeddan deg unnar-is sdat n terbaɛt CRB s 3 n yiswiyen ɣer ulac. Ayen yeǧǧan kra n’’yimferǧen’’ ad sutren rrwaḥ n uselway n Cherif Mellal. Acu kan, xas ma yella kra bɣan ad tṣeggem terbaɛt n yilmeẓyen n Leqbayel u ad tuɣal ad tecceɛceɛ am zik, maca llan kra ssaramen-as lexsara mi ara turar i wakken ad slummen ugar aselway Cherif Mellal. ‘’Dayen yessewhamen ! Amek seg tama zaɛma, ḥemmlen JSK, meɛna seg tama-nniḍen ssaramen-as lexsara ?

D asteqsi kan wammag tiririt tban am yiṭij’’, i aɣ-d-yenna yiwen gar wid yettabaɛen timsal n JSK. Am wakka, segmi yuɣal Cherif Mellal deg umekkan n Hannachi, ccwal ur yeffiɣ axxam n terbaɛt n yilmeẓyen n Leqbayel. Ahat s rrbeḥ n wass-nni n lǧemɛa iɛeddan, ad bdunt tlufa, sya d afella, ad fessint ladɣa imi la tettraǧu terbaɛt n JSK Talɣuɣa n Tefriqt ara yebdun deg ussan i d-iteddun. Ɣef wa dɣa i iwala umyurar Bensayaḥ, i d-yewwin iswi amezwaru sdat n terbaɛt n ASO, d akken ‘’agemmuḍ, ad aɣ-iɛiwen seg tama n tnefsit deg temlilit n Tefriqt i aɣ-yettraǧun. Agemmuḍ n wass-a, yusa-d deg lawan-is : tamezwarut, ad yesfeḍ lexsara n smana iɛeddan, tis snat, ad aɣ-d-yernu afud deg Talɣuɣa n Tefriqt i aɣ-yettraǧun’’.

Ma ɣef temlilit akked terbaɛt n ASO, yenna-d : ‘’Nusa-d i wakken ad nerbeḥ daymi i d-nefka nnig tezmert-nneɣ. Seg tazwara, nebɣa ad naweḍ s iswi. Aya, iɛawen-aɣ aṭas. Dayen ara aɣ-yefken afud ladɣa deg Telɣuɣa n Tefriqt. Am wakken ara nessefreḥ imferǧen-nneɣ xas ulamma  s lembɛid’’. I usmekti. Yewwi-d iswi amezwaru Bensayaḥ (53’), wis sin Hamroun (68’). Ha-tt-an terbaɛt n JSK deg umḍiq wis 5. Turar 4 n temliliyin :  Terbeḥ timlilit, texser tayeḍ, temɛadal deg snat.   

Hocine Moula