Accueil Tamazight Mačči menwala ad iftu !

Cwiṭ seg tmucuha n leqbayel : Mačči menwala ad iftu !

79
- PUBLICITÉ -

Yiwen wass tenṭeq tmeṭṭut γer urgaz-is, tenna-as: « Ay argaz, bγiγ ad ruḥeγ ɣer tmeγra, a-t-an ad gent tulawin urar ». Argaz: «Ruḥ, maca γur-m ad tεeddiḍ lawan imensi, ma ulac jmaεliman ar tebruḍ». Truḥ tmeṭṭut, tεeṭṭel, iεedda lmeγreb. Mi d-tuγal, yerra-tt, yenna-as: «Tebriḍ ifat gulleγ».

- PUBLICITÉ -

Argaz, yeqqim yetḥeyyer, yebra i tmeṭṭut γef wulac. Akken ad tt-id-yerr, yeggul s jamεliman. Amek ara yexdem. Iruḥ icaweṛ kra di tejmaεit, nnan-as: «Tegguleḍ dayen, tameṭṭut tebra, bγir ameyyez d unadi». Argaz, ur yesbiṛ ara imi yendem deg wayen yexdem, acku tameṭṭut-is, iḥemmel-itt, yufa iḍlem di ṛṛay-is. La itezzem iman-is, yettru. Yufa-t-id yiwen uḥbib-is, yewhem!

«D acu akka i ak-yuγen ay amdakel»?. Argaz: «Ansuf yis-k ay aḥcayci (argaz-nni qqaṛṛen-as aḥcayci), Lḥemdu lleh i mi ak-id-yefka Ṛebbi, a-t-an wul-iw iččuṛ. Aḥcayci: «D lxiṛ kan ?». Argaz: «Hatt Maṣer, hatt mMser». Yeḥka-as tamsalt. Aḥcayci: « I testeqsiḍ tajmaεt n yimusnawen ?». Argaz: «Awah! Steqsaγ, nnan dayen». Yuγal, yefhem uḥcayci lumuṛ, belli tajmaεt ttmuqulen kan anda ara ččen, ad ṛwun iseflan i wakken ad afen anda ara rekḍen. Aḥcayci: «Teẓriḍ, ass lmuḍaε flan, εreḍ-d tajmaεt-nni n yimussnawen, εreḍ-iyi-d nekk ad waliγ».

Iruḥ urgaz, iεreḍ-iten-id yiwen yiwen deg yiwen wass. Asmi i d-mlalen, yebda uḥcayci ad asen-d-iḥekku, ad asen-d-yessemεan awal, ad asen-d-yettawi tiqsiḍin. Netta yuγ lḥal d aḥcayci, yessen yakk lesrar yeffren. Armi tεedda lεica, nutni mazal zzhan, yuγal kkren-d ẓullen lεica, nnan-as: «Rnu-aγ-d cwiṭ ay aḥcayci, lehdur-ik d lemεun. Yenna-asen: « Ad nečč imensi ad nkemmel, ahat telluẓem ?».

Tajmaεt: «Ala, ur nelluẓ ara, imensi ur ifut ara, melmi nebγa ad t-nečč». Aḥcayci: «A-t-an ziγ imensi ur yesεi lawan imḥedded, a-t-an ziγemma tameṭṭut i d-yuγalen qbel lεica ur tεedda ara awal n urgaz-is, a-t-an ziγ imensi ur yettfat ara, ahya-ken ay iγeddaren, tebγam xellu n uxxam i wakken ad εemmṛen yiεebbaḍ-nwen.“Mačči menwala ad iftu”. Win ifettun izwar lxiṛ.

Yahia Yanes.

- PUBLICITÉ -