Mbeɛad tikliwin timeqqranin i d-yettilin yal ass n lǧemɛa, ttilint-d diɣ yal ass n ttlata tid n yisdawanen. Ass-nni n ttlata, 30 yebrir 2019, i d-tella tmesbanit tis mrawet n yinelmaden i d-yeffɣen s abrid i wakken ad kemmlen asuter-nsen, yessawalen i rrwaḥ n udabu azzayri. Mmaren-d yisdawen-agi di tikli-agi-nsen tis 10 d igelfan s abrid. Tella-d tmesbanit-agi-nsen seg tesdawit n Mulud Mɛemmeri, yellan deg Ḥesnawa armi d talemmast n temdint n Tizi Uzzu (tacumɛet). Ɣef 12h00 n uzal i bdan leḥḥun ssuturen abeddel n unagraw iḥekmen.
D tikli meqqren, ideg ddan yisdawanen d yinelmaden, akked yiselmaden, s talwit d liser. Ccnawi d yisuɣan s ṭṭelq n yijaɣuɣen akked wallus n kra n tezlatin tigrawliwin, llant tezlatin n Maɛtub (Ḥzen am leɛyun), Uleḥlu (Iǧadermiyen akked pouvoir assassin), Ali Ideflawen (Ǧǧet-iyi abrid ad ɛeddiɣ). Am wakken daɣen, i d-wwin ccnawi ideg ssuturen aṭas n temsal, gar-asent: “Anwa wigi, d Imaziɣen”, “Ulac ssmaḥ, ulac”. Gar wayen nezmer ad d-nɣer deg twerqtin-nni n usuter, d wagi : « Tamurt ur tettaf ixef-is alamma tufa aẓar-is », « Ad nennaɣ alamma yeɣli udabu ».
Am wakken daɣen i ḥedren yimagraden n tmendawit, gar-asen amagrad amenzu i d-yeqqaren : «Lezzayer d Tagduda Tamagdayt Taɣerfant ». Acu i d-ijebbden lwelha-nneɣ ɣef tikli-agi, d tilin swaṭas n wannayen deg yigenni ara tettwaliḍ ttferfiren, llan wid n yimaziɣen d wid n tmurt n Lezzayer. Ɣer taggara, ad d-nesmekti belli tikli-agi, tedda deg talwit d tegnit yelhan, akken-nni armi kfan deg tmeddit n wass. D tamezdayt tadigant n yisdawanen (CLE), i d-yessawlen i tikli-a, i yetturaǧun ad tili diɣ azekka deg tmesbanit tis 11 n yisdawanen n Tizi Uzzu.
Adaoun Abdelghani