Accueil Tamazight Mazal ur d-telli tifrat i uɣbel n ugudu

Iɣil Ɛli

Mazal ur d-telli tifrat i uɣbel n ugudu

70

Akken i nella newwi-d fell-as ameslay, mazal tettidir tdayṛa n Yiɣil Ɛli aɣbel d ameqqṛan, ayagi imi ur sεin ara amḍiq anda ara deggṛen agudu-nsen. D ayen i yeǧǧan abrid aɣelnaw wis 106 yeččur seg tamiwin-is d iḍumman. Ad d-nesmekti d akken ur yelli ara usentel-a d amaynut, imi tadyant tesεa ugar n mraw n yiseggasen ur tefri. Yerna ɣef leḥsab n yiεewwiqen yellan mazal, ad ternu aεeṭṭel. Ma yella nemmeslay-d s yisem n yimezdaɣ, ineggur-a ttcektin seg liḥala n temnaḍṭ-nsen, imi qqaṛen yewwi-d ɣef yimḍebbṛen n tdayṛa akked tɣiwant ad asen-d-afen amkan s tazzla uqbel ad d-yelḥeq unebdu, acku, tfuḥ akk lḥala. Rnu ɣer waya, tuddar-nsen, sruḥent cbaḥa d sser, s tugniwin n uhicuṛ i yettendeggaṛen di yal tama. Ula d ttawilat n ujmaε n ugudu ɣur-sen xuṣṣen nezzeh, ur sεin ara ula d ikumyan uzzigen i waya. Ma yella d wigad n SONACOME ttεeddayen-d kan yiwet n tikkelt di ddurt akken ad glun s uhicuṛ-nsen. Seg tama tayeḍ, aselway n tɣiwant n Yiɣil Ɛli, iwekked-d d akken, mačči d tikkelt neɣ d snat i d-ufan lqaε anda ara deggṛen agudu-a, lameεna, d kra n warraw n temnaḍt-a i yettagin, teffɣen-d mgal. « Ayen iwumu nessḥassef ugar, d idrimen i tettdeggir tɣiwant-nneɣ deg useggas, i wakken ad tessaweḍ ahicur-nneɣ ɣer twilayt-nniḍen, mebla ma nettu belli taɣiwant-a mačči d tin yesεan tadrimt » . I aɣ-d-yenna yiwen n yilemẓi. Ikemmel deg wawal-is: « Nxus deg waṭas n yiṣenfaṛen, ihi tadrimt-a i yettruḥun ɣer uṣenfaṛ-a, yewwi-d ad tt-nfaṛes deg wayen-nniḍen » . Nekni seg tama-nneɣ ad d-nini deg temsalt-a ur teslik twennaḍt, ur teslik tdawsa n yimdanen, ur teslik cbaḥa d thuski n ugama d yidurar n tmurt-a. Dɣa, deg umkan n yimɣan, tturent tebyirin idurar, ma d ijeǧǧigen d ticelwaḍ i yettfen amḍiq-nsen. Daymi i ilaq ad zdin yimḍebbṛen d yimezdaɣ ṭṭabla n umcaweṛ i wakken ad d-afen tifrat.

K. K.