Accueil Tamazight Mazal ur yefri uɣbel n tnezduɣin n AADL

Bgayet

Mazal ur yefri uɣbel n tnezduɣin n AADL

46

Ttcektin ussan-a wid ixedmen akaram i wakken ad d-awin tanezduɣt s ttawil-a n AADL, seg uεeṭṭel n uxeddim deg tnezduɣin-a. Dɣa, akud i asen-d-yettunefken, iεedda lawan-is yerna s waṭas, armi llan wid yesεan ugar n 18 n yiseggasen nutni d araǧu. D ayen i ten-yeǧǧan ṣṣawḍen tamsalt i Lwali n Bgayet Mass Aḥmed Mεebbed. Aneggaru-a dɣa, yefka-asen-d awal belli ad iwali deg temsalt-a n lebni i yesεan aɣbel n uεeṭṭel d ameqqṛan di twilayt n Bgayet, ladɣa tinezduɣin n AADL ideg εeṭṭlen lecɣal nezzeh.

Ayagi, yegla-d s lemḍeṛṛa i twaculin i yettṛaǧun, acku, llant tid yettidiren di beṛṛa, tiyaḍ di liḥala ur neṣṣefṛaḥ ara. Yenna-asen Lwali daɣen d akken d tadrimt tageεmirt ara as-fken i uḥric-a n lebni, ɣef leḥsab-is ugar n 500 n yimelyaṛen ara d-imud i wakken ad kemmlen lecɣal n tnezduɣin-a. Ama d wigad n waman n tissit, tafat, trisiti, d wayen akk ilaqen i tmeddurt yelhan. Ma yella ɣef temsalt n tnezduɣin n Wed Γiṛ ur nesεi trisiti, iwekked-asen-d belli ad asen-d-awin seg Leqṣeṛ deg wakud iqeṛben. Seg tama tayeḍ, yefra-asen ula d tamsalt n waman, imi ad ten-id-awin seg ubaṛaj n Ticiḥaf, seg Tala Ḥemza, wa ad ten-sizedgen. Ad d-nesmekti d akken aɣbel-a, ur yelli ara d ameynut, imi ula deg tallit n lwaliyat yezrin ddeqs n medden i yeccektan, lameεna ur d-yelli ara win i d-yeslan i tuɣac-nsen.

K. K.