Accueil Tamazight Medlent 13 n tḥuna n tuččit xfifen

Wehran : Medlent 13 n tḥuna n tuččit xfifen

54
- PUBLICITÉ -

Uɣalent taggara-a tḥuna yesnuzun neɣ ixeddmen tuččit xfifen neɣ ayen iwumi ssawalen medden s yisem n Fast food, deg temdint n Wehran d idgan n usemres war tuddsa, ur nesɛi ara tiwtilin iwatan i tigin n tgella iwulmen i yimdanen. Bdu seg tdersi n tezdeg akked leɣla d war aqader n usaḍuf n leqdic. Deg yiɣerman i yeččuren d imezdaɣ, ttlalent-d tḥuna-a am treɣla, imi d ibaṭimuten imaynuten yettwabnan, ɣer din i guǧǧan waṭas seg yimezdaɣ, am yiɣrem Lyasmis, Ṣṣabaḥ, Nnur… yettwassnen s tigti n tḥuna-a n tuččit fessusen.

- PUBLICITÉ -

Dɣa imalas yezrin, ffɣent kra n trebbaɛ n Tenmehla n tnezzut n twilayt n Wehran ɣer unnar, d ayen i ten-yeǧǧan ad bedden ɣef waṭas n twuɣa i ttgen wid ilan tiḥuna. Ufan ulac maḍi tawtilt tadawsant i uheggi n tuččiyin-a tifessasin. Amedya, deg yiwet n tḥanut deg tama n Ṣṣabaḥ, ufan ɣer yiwen asafar n lbaṭaṭa taqdimt i ixesren, yettwahegga wazal n 30 kilu deg-s i usexdem deg tuččit ara yettunefken i yimsebriden. Imraqben-agi, bedden daɣen ɣef lqella n tezdeg deg tgelliwin am rruz d cerba, ula d tuččiyin i swayes tettwassen temnaḍt n Wehran d twilayin n umalu am karantika, lɛeṣban, ur gerrzent ara i tuččit, acku wigi i tent-yettheggin, “ur xemmemen ara ɣef tdawsa n umdan, lhem-nsen amenzu d adrim swayes ara ččaren leǧyub-nsen”,; akken i d-nnan kra.

Ɣef waya, deg tuffɣa-a i tga Tenmehla n tnezzut n twilayt, temdel ugar n 13 n tḥuna, imi d amihi ɣef umdan d tdawsa-ines. Ladɣa ma neẓra belli ugtent tḥuna-a deg tamiwin ideg qqaren yinelmaden n uɣerbaz, neɣ anda llan sbiṭarat d kra n wammasen ideblanen. Yessefk ihi ad yili uxemmem ɣef teṣḥiḥt n bnadem uqbel ad ifat lawan, akken yella deg yinzi “Leḥder yugar leqḍeɛ”.

Khaled Achoui

- PUBLICITÉ -