Aḥric 1u
Qqarren zzman, kullec d nneyya n wul, ma teṣfa nneyya d tin i d lfayda, ma yella ur teṣfi ara, ulayγer iles γas yessen amek ara yehder. Akken yeqqar Ccix Muḥend U Lḥusin: « Laxeṛt ur teḥdağ ara aqezzeb». Ṛebbi, iẓer γer wulawen, wama ayen-nniḍen yettwalmad. Yiwen wass, εeddan-d kra n yimnayen, di tmusni-nsen d irgazen iselmaden, inehhun agdud γer ubrid n Rebbi. Ihi, yeṭṭef-iten lḥal deg yiḍ, rran γer yiwet n temγart, nsan γur-s, testerḥeb yis-sen akken ilaq. Mi d-yewweḍ lawan n tẓallit, wallan-tt tekker tettẓalla, ttmuqulen-tt mi i teqqar: “Mimuna, tessen Rebbi, Rebbi yessen Mimuna”. Tettεawad ala i wawal-agi. Armi tekfa, yenṭeq γur-s yiwen seg yimussnawen-nni: “A Mimuna! Σiwed-d amek akken i as-teqqarreḍ mi i tettẓallaḍ”.
-Mimuna tessen Rebbi, Rebbi yessen Mimuna.
-A la a Mimuna, mačči akken ara tettẓallaḍ.
-Amek ihi a mmi?
-Ad tbeddeḍ, ad as-tiniḍ lḥemdu lillah Rebbi lεalamin. Ad txedmeḍ akka, ad tettğaεleḍ akka…Armi i as-yemla amek ilaq ad teẓẓal s leqṛan n tẓallit. Taṣebḥit, kkren-d yimnayen beqqen-as sslam ruḥen. Teqqim Mimuna weḥd-s. Mi d-yewweḍ lawan n tẓallit, tebγa ad d-teẓẓal, maca iεeṛq-as wamek i d as-yesselmed umusnaw-nni iεeddan, si tama-nniḍen tettu amek i tella zik tettẓalla. Si zzεaf-nni i tt-iγumen, sebba n tẓallit i as-iruḥen, tedεa-as i umusnaw-nni: “Ad as-tent-yesseεreq Rebbi i kra i d i yi-tent-yesεerqen. Amusnaw-nni, mi i iteddu d terbaεt-is, iḥulfa d yiman-is ur yeskir ara, amzun yerkeb-it kra, iεeṛq-as ccγel, ixeṛb-as ṛṛay…
Tettkemmil
Yahia Yanes