Teḍra-d twaɣit yesseḥazen deg twilayt n Wehran ass-nni n larebɛa iɛeddan, s uɣelluy n lbenyan s lekmal-is deg tama iwumi qqaren Choupo. D tadyant i yeglan s sin n yimdanen d asfel, yiwen n urgaz (L.Q) d tmeṭṭut-is, akked 5 n yimejraḥ i yettwawin akken kan teḍra tedyant ɣer sbiṭer ad ttudawin. Ɛla ḥsab n teɣbalut i aɣ-d-yewwḍen, abaṭimu-a d aqdim yakan, acḥal n tikkal i ssutren yimezdaɣ-is deg yimasayen ad t-sseɣlin u ad as-ɛiwden lebni, maca ineggura-a sɛuẓẓgen, d ayen i yeǧǧan ad d-teḍru twaɣit-a yeglan s terwiḥin ur nuklal. Lwali n Wehran amaynut Mass Ɛebdelqader Ǧellawi, akken i t-id-yewweḍ yisalli, yerza srid s amkan n twaɣit, maca imezdaɣ yellan imir deg umkan mmugrent-id s yisuɣan, amer mačči d iɣallen n laman i yethednen taswiɛt tili teḍra-d twaɣit. Ma d ixeddamen n uḥuddu aɣarim xedmen ayen yellan fell-asen, ssukksen-d imettanen seg ddaw n ubiṭun i d-yeɣlin, rnu wwin s tɣawla imejraḥ ɣer sbiṭer, gar-asen kraḍ n warrac imecṭaḥ. Ma d argaz-nni yemmuten, yella ixeddem d aɛessas n uɣerbaz, cehden fell-as wid i t-yessnen s lewṣayef-is yelhan, ad fell-asen yeɛfu, yazen-d ṣṣber i twaculin-nsen.
Kh. A.