Mazal igellu-d rrebrab n yibarden s lerwaḥ. Dɣa deg wass-nni n lḥed iɛeddan, 15 seg waggur n cutember, ɣef lewhi n 23h00 n yiḍ, deg ubrid aɣelnaw wis 35, i d-yeḍra yiwen ubaxix n ubrid, anda mmuten sin n yimdanen d ujraḥ n sin-nniḍen, deg uɣelluy n ṭumubil ɣer wuggug (barrage) n Teksebt i d-yezgen deg usamar n temdint n Tizi Uzzu. Yeḍra-d ubaxix, mbaɛd mi teffeɣ ṭumubil, i d-yewwin rebɛa (04) n yilmeẓyen, ɣef ubrid-is, syin teɣli ɣer wuggug n Teksebt, ɣef leḥḥsab n uselɣu n yiɣallen n usellek. Sin n yilmeẓyen yesɛan 25 d 27 n yiseggasen deg leɛmer-nsen, n tɣiwant n At Dwala, mmuten deg ubaxix-agi, ma d sin-nni-nniḍen ttwajarḥen.
Deg waddad n umihi, wwin-ten yiɣallen n usellek ɣer sbiṭer Nedir Muḥemmed n Tizi Uzzu. Deg teswiɛt-nni n usellek n yiseflan, yettwajreḥ yiwen n uɛegal n yiɣallen n usellek, ula d netta, wwin-t ɣer sbiṭer Nedir Muḥemmed n Tizi Uzzu. Tawaɣit yecban tagi, teḍra-d yakan deg useggas n 2015, anda i d-tegla s lmut n tlata (03) n yilmeẓyen n n temdint n Yiɣil Lmal, yettabaɛen ɣer tɣiwant n At Zmenzer.
Ali Zalouk