Seld n usɛeẓẓeg n tmeẓẓuɣt n yimḍebbren n Tenmehla tazzayrit n waman (ADE) ɣef wayen ssuturen ixeddamen, ladɣa timerna deg ssuma, xedmen yixeddamen-is asalag (grève), ass n acer d arim, 6, 7 seg waggur n tubeṛ 2019. Yella-d ula d yiwen n unejmuɛ sdat n tenmehla-agi i d-yezgan deg tlemmast n temdint n Tizi Uzzu. Tigawt -agi timezgit n sin wussan i yal ddurt, tebda yakan seg 23 deg waggur n cutember iɛeddan, anda ssuturen aɛawed n tmuɣli deg uɣruḍ n yixeddamen anda i yettwali unmalu (syndicat) n yixeddamen, ddrus maḍi, u yewwi-d ad tili tmerna deg-s. Am waken ssutren daɣen yixeddamen-a agerrez n tewtilin n lxeddma.
Dɣa deg unejmuɛ i d-yellan sdat n tenmehla Tazzayrit n waman, heḍren-d yixeddamen aṭas ɣef yiɣeblan i d-ttmagaren deg yimeḍqan n uxeddim, yettilin deg lḥers meqqren deg kra n tegnatin, sdat n lɣiḍ n yimezdaɣ. Ɣef leḥsab n yimḍebbren n unmalu, lexṣas n ttawilat iwatan yeɛgeb aṭas axeddim, dayen i d-yettawin iɣeblan meqqren deg uxeddim. Nnan-d yimeḍebbren n tenmehla Tazzayrit n waman d akken s kra n wayen ssutren ixeddamen, d ayen yellan d sswab, d azref, maca ur zmiren ara ad xedmen acemma, dayen yeffɣen i lebɣi-nsen, imi d aɣbel yeɛnan yakk tamurt n Lezzayer. Sdat n usɛeẓẓeg n tmeẓẓuɣt i tikkelt-nniḍen n yimḍebbren teɛna temsalt, kecmen yixeddamen n tenmehla Tazzayrit n waman deg yiwen usalag war aneḥbus alamma rran-d yimḍebbren teɛna temsalt ɣer tuget n wayen ssutren.
Ali Zalouk