Accueil Tamazight Qrib ad kfun lecɣal deg ubrid amaynut

Xeṛṛaṭa

Qrib ad kfun lecɣal deg ubrid amaynut

260

Akken i nella nemmeslay-d yakan, teddun lecɣal akken i iwulem deg ubrid n Ɛecba. Abrid-a i yettabaεen ɣer win aɣelnaw uṭṭun 09, neɣ win yellan gar twilayt n Bgayet d tin n Ṣtif. Ddeqs-aya segmi i yebda deg-s uxeddim, lameεna mazal ar ass-a ur yekfi ara. D ayen i yeǧǧan lwali n Bgayet yesṭuqqut tirziwin ɣer dinna, i wakken ad yeḥṛes tilufa ɣef yimasayen n uṣenfaṛ-a. Ad d-nesmekti d akken, tirza-ines taneggarut, tella-d ass n, 29 yennayer yezrin, netta akked waṭaṣ n wudmawen-nniḍen. Garasen, iselwayen n tɣiwanin i d-yezzin i temnaḍṭ-nni, am At Smaεel, Taṣexṛiwt, Iderginen, d Xeṛṛaṭa.

Rnu i wigi, imḍebbṛen n tdayṛiwin n Yiderginen akked Xeṛṛaṭa. Deg tirza-ines dɣa, yesseḥres lwali ɣef umasay n tkebbanit taturkit (UZGUN) i yeṭṭfen aṣenfaṛ-a, i wakken ad yekfu aḥric aneggaru deg ussan i d-iteddun. Ayagi bac, ad bdun lecɣal n uqeεεed n lɣiṛan n Xeṛṛaṭa. Ladɣa imi di yir liḥala i llan. Mebla ma nettu belli inehhaṛen i dyettεeddayen syin-a, ur llin ara di tɣellist, ama seg tama n tafat i ixuṣṣen nezzeh neɣ seg tin n yiberdan d leḥyud, i yehrurin akk.

Di taggara, ɣas ma yella uqeddic deg uṣenfaṛ-a iteddu akken ilaq, meḥsub yelḥeq ɣer taggara-s, imi ɣef leḥsab n teɣbalut-nneɣ, afmiḍi n uxeddim deg-s yugar 75%, lameεna ddeqs n temsal i mazal xuṣṣent deg-s. Amedya, ur llan ara deg-sen iberdan uzzigen i yimdanen, d yiviluten. Neɣ s unameknniḍen, amdan ur yezmir ad yeḥbes, ad ifaṛeṣ ccbaḥa n ugama i yellan deg wadeg-nni. Ɣef usentel-a dɣa, yenna-aɣd yiwen n yilemẓi : « Amek amkan am wagi, tahuski-s tif tilisa. Tessur deg-s ccbaḥa n yimɣan d tezdeg n waman. Meεna ayagi ur as-fkan ara azal, ihi yewwi-d fell-asen ad εiwden leḥsab-nsen ».

K. K.