Seld ayendin d asuter d uraǧu, teddun yilemẓiyen n tɣiwant n Tsexriwt, 60 n yikilumitren ɣer Unẓul-asamar n Bgayet, ad tthennin si taluft n unnar-nsen aɣiwan n Lberj n Mira ur nelli ar tura akken i t-ssaramen.
Aṭas-aya nutni suturen abeɛda ad as-temmag lqaɛa n ugazun akken ad ḍemnen kra n tɣellist i yiman-nsen, imi walan ɛeṭṭlen ayendin akk yimdebbren iɛeddan seg tɣiwant ur d-lhin d waya ulamma d aqbur nezzeh unnar. Ɣef usentel-a, am wakken i t-id-newwi yakan deg Uɣmis n Yimaziɣen, llan heggan yilemẓiyen n taddart-a ula d yiwen n uberriḥ d ameqqran ideg i d-cektayen ɣef uɣilif-nsen. Si tama-nniḍen, gar wayen ṭṭalaben daɣen yinaddalen n tɣiwant-a ɣef wayen yerzan annar-a, d lebni n yimeḍqan n yiɣimi i yimnezzhen akked usbedd n texxamin n usuccef d ubeddel n tmelsiwt.
Dɣa, deg tirza-ines yezrin deg duǧember, iger lwali n Bgayet tamawt i txessast-a, yerra i tiɣri n yilemẓiyen-a. Aya, mi yessuter deg unemhal n yilemẓiyen d waddalen n Bgayet ad yesseqleɛ s tazzla ulɣu n tiɣri i tikci n usenfar-a i yerzan taduli n unnar n Lberj n Mira s ugazun. Ugar n waya, ɣef wawal n teɣbalut-nneɣ, yesseḥres lwali ɣef beddu n yiqeddicen deg wussan-a akken ad afen iman-nsen deg taɣult-a yilemẓiyen n temnaḍt-nni, rnu yessuter deg uselway n tɣiwant n Tsexriwt, Mass Maǧid Buǧiṭ, ad as-d-iheggi taferrawt tatiknikt ideg ara d-ddun akk lecɣal iwumi yesra unnar-a aɣiwan, am ureqqeɛ n tseddarin n yimferrǧen akked texxamin n ubeddel n tmelsiwt.
Akka tura, ttraǧun kan yilemẓiyen n temnaḍt-a, ad yettwasemres kullec deg unnar akken ur yettɣimi wawal d amiru (lweɛd) ideg ɛyan yakan, imi beggnen-d aya aṭas n tikkal deg tigawin merra i gan deg wayen iɛeddan.
M. K.