Accueil Tamazight Reṣṣant tezlatin-is deg uɣerbaz

Yezri useggas ɣef tmettant n ucennay Idir

Reṣṣant tezlatin-is deg uɣerbaz

476
- PUBLICITÉ -

Iḥḍer-d rrwaḥ ad nruḥ, tikkelt-a d tidet iruḥ unaẓur. Yeǧǧa-aɣ uemqqran n ccna n teqbaylit, ccna azzayri, ccna n tmazɣa d umaḍal merra. Seg Dda Sliman ar Lwennas, Dda Crif d Ǧamal Ɛellam, iḍfer-iten Yidir, anaẓur agraɣlan. Anwa ur t-nessin ara? Anwa ur suznent ara tezlatin-is? Anwa ur nḥemmel ara aẓawan-is yebbaḥen d tmeslayt-is yettweṣṣin ɣer yakk ayen yelhan? Ass-a Idir iruḥ, d lawan i d-iḥeḍren, maca akken yella deg wawal, anaẓur ur yettmettat ara, d inig kan i yettinig, acku yiwen umeqqran am Idir, uqbel ad aɣ-yeǧǧ, yeǧǧa-aɣ-d. Ccna-ines yezzi-d i ddunit, yezger lebḥur, yerẓa tilisa, yekcem iɣerbazen.

- PUBLICITÉ -

D tizlatin-is i ttafen yiselmaden n tmaziɣt ladɣa wid n uɣerbaz amenzu d tisulal d trekkizin i uselmed n tmeslayt tamaziɣt, s ccna fessusen yettwellihen ɣer tmagit d tgemmi n tmazɣa. Ladɣa tineggura-a, segmi yebda yettiwsiɛ uselmed n tmaziɣt deg wakal n tmurt, amek ala, amek ur nesselmad ara tizlatin n Idir? Tizlatin i d-iḥewsen timura, yewwi-d ad sent-nefk amkan deg tmurt-is, ad tent-nmud d tarzeft, d arraz i yinelmaden i d-yettenkaren s leḥmala n tutlayt, s ukemmel n ubrid n laṣel i asen-d-neǧǧren yimezwura yecban Idir.

Deg kra n yiɣerbazen n temnaḍin tiɛerbawalin ideg tekcem tmaziɣt, akken ad asen-tishil tutlayt i yimseɛraben, fernen kra n yiselmaden deg temsirin timenza tizlit n Ḥay ḥay ya mumi, s uẓawan-is igerrzen, d wawalen-is isehlen i ususru d tigzi, akken ad kecmen yinelmaden ɣer yisental d yirmuden-nniḍen n tutlayt s sshala. D tagnit ad lemden seg tezlatin n Idir tagmat, leḥmala, idles, tamurt, tallelt d leqder. Syin yal mi tettunefk tegnit, yesɛa uselmad akud, sselmaden s ccna d uẓawan tuɣac n Baba inuba, Ssendu, Taɣribt-iw, Tamacahut n tsekkurt, ladɣa ma neẓra s ccuq d lḥir i ttraǧun yinelmaden ad cnun tizlatin n Idir i ḥemmlen aṭas.

Ula d iswiren ilemmasen d yisnawiyen, yewwi-d ad kecment kra seg tezlatin-is ɣer wahilen ilmend n teqbaylit lqayen d tmedyazt wessiɛen i yessemres bab n Awah awah. Akken daɣen i yetturaǧu ad d-nnulfunt tezrawin, idlisen d yinadiyen di tmedyazt n Idir deg wammasen isdawiyen d yigezduyen n tutlayt d yidles n tmaziɣt. S wakka, ɣas yeǧǧa-aɣ Ḥamid Ceryeṭ, amdan, maca ad yeqqim yisem n Idir d agerruj yeddren, ɣas tɣab tfekka-s, tizlatin-is mucaɛen urǧin ad ɣibent. D abrid n tgejda n ccna n teqbaylit i tewwi tmettant uqbel-is i t-yewwin, gar-aneɣ ass-a ddren i lebda, acku refden timmuzɣa, cebbḥen tutlayt, ad tzux yis-sen Tferka, ad ten-teḥrez teqbaylit. Di talwit ay anaẓur, ccna-inek yufeg deg yigenwan, yuzzel di tmura. Ad tidireḍ i lebda a Yidir.

                                                                                                                      Khaled Achoui

- PUBLICITÉ -