Accueil Tamazight Rreḥba n udlis amaziɣ

Leqdic adelsan di tmurt n Fransa

Rreḥba n udlis amaziɣ

47

Ass-nni n sed 16 unbir 2019 yezrin, yella-d d anesbaɣur s leqdicat i d-yellan i lfayda n tutlayt d yidles n teqbaylit deg tamiwin yemgaraden n tmurt n Fransa. Dɣa deg tɣiwant n tama tis xemsa (5ème arrondissement), tella-d Rreḥba n udlis afransis-amaziɣ ɣef 11h n ṣṣbeḥ ar 19h n tmeddit. Tessemlal-d Tzeqqa n temsikniyin 40 n yimeskaren seg wid i d-yessaẓergen idlisen n tmaziɣt neɣ n tefransit. Gar yimeskaren-a, llan wid yettidiren di tmurt-a, llan wid i d-yusan seg berra, am Lezzayer, Kanada, Lalman… Ma d ṣṣenf n yidlisen i d-yersen yemxalaf: seg wid i d-yessenkaden amaḍal d tmeddurt n yimaziɣen am umezruy, anadi (tinagiyin), akked wungalen, timucuha, tamedyazt, tutlayt d tsertit.

Rreḥba-a n udlis amaziɣ di tmurt n Fransa, tuɣal tettwassen taggara-a imi d taẓrigt tis xemsa i d-yezzin aseggas-a. Seg tama n yimeskaren i d-yellan deg usiher, llan wid yettwassnen deg unnar n tira s tmaziɣt neɣ ɣef tmaziɣt am Omar Oulamara, Ṭeyyeb amsedrar (Abdelli) d wiyaḍ. Llan daɣen yimaynuten deg unnar am Anissa Mohammedi. D yimeskaren imaynuten akken ad d-rnun tirmit di leqdic-nsen u ad d-yili gar-asen d yimezwura ɣer tira uskasi d umbaddal n tiktiwin. Akken ara sɛun, diɣ, tabɣest i ukemmel deg leqdic i lfayda n tutlayt tamaziɣt. Rzan-d ɣer Rreḥba-agi waṭas n Leqbayel i yettidiren deg tmurt n Fransa, seg wid iḥemmlen adlis d tɣuri, uɣen idlisen, ṭṭfen tugniwin d yimeskaren, gan iskasiyen yid-sen deg yisaragen i ḍefren i d-yellan deg wahil.

S tumert i d-ffɣen syin ɣer taggara n wass, d usirem-nsen ad gten leqdicat idelsanen ladɣa seg wid yerzan adlis deg tmura n lberrani, akken ad bedden mgal tatut n yidles u ad d-yili dima ucuddu ɣer uẓar.

Asaru ɣef ugraw amaḍlan Amaziɣ

Seg tama-nniḍen, deg wass-nni yakan, thegga-d Tsuddut tamaziɣt (I B) i d-yezgan deg temdint n Marseille leqdic yerzan asenɛet n usaru arrat “Agraw amaḍlan Amaziɣ-amhaz n umennuɣ-”, n umsuffeɣ n uneɣmas aqdim n tiliẓri BRTV Muḥend Qasiwi. Iswi n leqdic-agi, d asmekti n talliyin qeṣṣiḥen iɣef i d-ɛeddant tmura n tmazɣa d lbaṭel i d-yersen fell-asent seg yiduba d yiwunak i tent-inebḍen, akked tmerna n ugraw i tmazɣa deg 20 n yiseggasen-a ineggura. Ma d tidyanin n usaru, wwint-d ɣef useḥres d tmuḥeqqranit i d-yettilin seg waṭas iseggasen-aya sɣur iwunak i yesmersen allalen isertanen, imsulta, allalen isensegmanen d wid n taywalt mgal aɣref d tɣerma tamaziɣt, akken ad rrẓen acuddu n yimezdaɣ n Tefriqt Ugafa d umezruy-nsen.

D iɣerfan n Tegzirin Tiknariyin, Rrif, l’Atlas, Leqbayel , Lewras, Tunes d Libya i yeddren maḥyaf-agi. Maca s tezmert, s tebɣest, s lebɣi i ṣebren yiɣerfan-agi i lbaṭel d uḥettem n tedyulujit taɛrabt tineslemt mgal tidet n umezruy d tilawt tamirant n tmazɣa. Ɣef waya i xemmen yigduden-a i usnulfu n tuddsa ara yezḍen gar tmura-a, s wakka i d-mlalen yigensasen n umennuɣ i tmaziɣt. D ayen i yeǧǧan ad d-ilal Ugraw amaḍlan amaziɣ (CMA) deg yiseggasen ideg tezder Lezzayer deg wasif n yidammen, Libya d Lmerruk i yeddren maḥyaf aberkan.

Kh. A.