Accueil Tamazight Ruḥen sin n yilemẓiyen ...

Bgayet

Ruḥen sin n yilemẓiyen d iseflan

58

Qqaren yimezwura : ‘’Aḥader yeɣleb aqader’’. Ihi, yelha win yettḥezziben i temsal uqbel ad yeḍru uxeṣṣaṛ. Di tegrest-a, imi d taswiεt n usemmiḍ, yewwi-d ɣef umdan ad t-yessanef ɣef yiɣsan-is, am s ucεal n tmes i wakken ad teḥmu tfekka-s.

Meεna ayagi seg tama-nniḍen, yeḍḥa-d d amahi ɣef waṭas n medden, ladɣa wid yesseḥmayen s ttawil n lgaz n lbuṭan. Dɣa, d ayen i yeḍṛan akked yiwen n yilemẓi i yesεan ala 30 n yiseggasen di leεmer, i yufan yiqeddacen n Uḥuddu aɣarim yexneq s lgaz. Ayagi yella-d di taddart n Buɣiden, deg tɣiwant n Yiberbacen, anida iruḥ yilemẓi-a d asfel n lgaz n CO2. Ad d-nesmekti d akken, ɣef leḥsab n Uhuddu aɣarim, d netta i d amettan amezwaru i yemmuten seg lgaz-a deg useggas-a amaynut.

Seg tama-nniḍen, tikkelt-a deg Tɣiwant n Wed Γir, tedhem tmacint n uṣiweḍ n yimdanen i yettawin seg Bgayet ɣer Lezzayer tamanaɣt yiwen n urgaz. Axessar-a, yedṛa ass n arim 14 di yennayer yezrin, iruḥ d asfel-is umdan-a i yesεan 44 n yiseggasen di leεmeṛ-is. Ɣef leḥsab n teɣbalut-nneɣ, asehwu-a, yeḍra-d ɣef 07:00 n tnezzayt, deg umḍiq iwumu qqaṛen Itelbaciren. Ɣas ma yella iqeddacen n Uḥuddu aɣarim xeddmen axeddim-nsen, lamaεna amdan-nni yessufeɣ tarwiḥt deg umḍiq-nni.

K. K.