Tella-d tmeɣra n ufrag n warrazen n tezrigt-is tis 7 n Temsizelt Aïssat Rabah n taddart zeddigen ass-nni n lexmis, 7 deg unbir iɛeddan, deg Uxxam n umezgun Kateb Yacine n temdint n Tizi Uzzu. Tebda temlilit-a s wawalen i d-yefka uselway n Useqqamu aɣerfan n lwilaya n Tizi Uzzu, Mas Aouchiche, i d-yesmektin amezruy n temsizzelt-a anda i d-yenna belli d aselway aqdim n useqqamu-agi, Mass Aissat Rabah, i d-yeslulen tikti-agi n temsizzelt i yebdan deg useggas n 2007, acu kan ur as-yeḥḍir ara, imi yettwanɣa uqbel, deg useggas n 2006. “Syin, teḥebes temsizzelt armi d aseggas n 2012 imi mačči d FFS i yeṭṭfen Aseqqamu aɣerfan n lwilaya”, i d-yesmekti Mass Aouchiche.
Mbeɛd kra n wawalen-nniḍen sɣur kra n yinebgawen, yettusenɛat-d usaru ɣef Aissat Rabah i d-ihegga Mass Ali Abdat iwumi isemma : “Da Rabaḥ, azamul n tezdeg”, anda i d-yejmeɛ aṭas n yinigan i d-yemmeslayen ɣef umeɣras mass Assat Rabah. Yal wa s tnagit-is, yal wa d acu n tmuɣli igerrzen i yesɛa fell-as, acu kan ɛedlen yakk deg yiwen wawal “Aissat Rabah, xas yeǧǧa-aɣ, meɛna yeǧǧa-aɣ-d ayen ur nettaǧa”. Ma yella d mmi-s n umeɣras, Mass Abdennour Aissat yenna-d : “ Ferḥeɣ imi isem n baba icudd ɣer leqdic yeɛnan tezdeg”.
Ma d agemmuḍ n temsizzelt n useggas-a, yella-d akka: Deg umḍiq amezwaru taddart n Saḥel (At Wizgen ) ara yawin 9 n yimelyan n yidinaren; deg umḍiq wis 2 Taddart Icerqiyen ( Mɛatqa) s 7 n yimelyan n yidinaren; ma deg umekkan wis 3, ad naf taddart Iẓerruden (Tirmitin ) ara yawin 6 n yimelyan n yidinaren; amekkan wis 4 iṣaḥ-d taddart aberran (Tirmitin) s 5 n yimelyan n yidinaren; syin d taddart Taxerraǧit ( At Buwaddu) i yezgan deg umḍiq wis 5 ara d-ṣaḥen 4 n yimelyan n yidinaren; ma d taddart At Amer (At Buwaddu), tewwi amekkan wis 6 s 3 n yimelyan n yidinaren; deg umḍiq wis 7, ad naf taddart At Ɛissa Uyeḥya (At Yahya) s 3 n yimelyan n yidinaren ula d nettat; ma d imekwan 8, 9 d 10 ṣaḥen-d tudrin-a akken i d-mmezwarent s 2 n yimelyan n yidinaren, taddart Tafrawt (At Yaḥya ),taddart Buyeɣẓer (Frikat) akked taddart Aẓra (Tigzirt).
Ma d igemmaḍ n temsizzelt-nni n taddart ifazen i d-yellan gar n tudrin i yewwin deg yiseggasen iɛeddan arraz, yella-d akka: Deg umekkan amezwaru, ad naf taddart n Bumesɛud (Imsuḥal) s 3 n yimelyan n yidinaren; tis snat taddart Tiferdud (Abi Yusef) i yewwin 2 n yimelyan n yidinaren; amḍiq wis 3, iṣaḥ-d taddart Talbant (Zekri) n 1 n umelyun n yidinaren.
Souhila Yamani