Salim Lakhdari, d yiwen n unaẓur ilemẓi yesɛan lebɣi meqqren, yefka azal i wayen ixeddem. Yekker-d s leḥmala n ccna segmi meẓẓi, yewwi-d abrid-is s tezlatin n yinaẓuren iqbayliyen i icennu asmi yeqqar deg uɣerbaz. Imir i as-d-iban ubrid n ccna, asmi i as-slan kra n yimeqqranen n ccna deg Tfaska n ccna deg uxxam n yidles n Bgayet, dɣa sbeɣsent, imi walan yekseb ṣṣut icebḥen, rnu yesselḥay akken iwata allallen yemxalafen n tẓuri d ccna. Ilul Salim Lakhdari deg temdint n Bgayet, maca tadra-ines tettuɣal ɣer temnaḍt n Mellala, taɣiwant n Wad Ɣir ur nebɛid ara s waṭas ɣef Bgayet. Anaẓur-a, d netta i yettarun tizlatin i yiman-is, icennu-tent. Ɣas ma d ilemẓi, maca yessekles yakan ar ass-a ukkuẓ n yiḍebsiyen. Yebda amecwar-is n lfen deg useggas n 1990 s yiwen leqdic iwumi yefka azal, iɣellet-it s tmeɣriwin i d-yernan di ccan-is d ccan n tezlit acku walan wid akk i as-isellen d acennay ara yesɛun azal deg yimal. Dɣa d annecten i t-yeǧǧan ad ikemmel deg ubrid n tẓuri s lebɣi. Iɣellet leqdic-is s ussuffeɣ n uḍebsi-ines amezwaru aseggas n 2007 “Ruḥ ay itbir”, aṭas n wid iwumi yeɛǧeb acku deg-s yewwi-d ɣef yisental yemxalafen n tmetti s yiwen uẓawan icebḥen. D ayen i t-yesbeɣsen ad d-yernu wayeḍ deg useggas n 2009. Syin ikemmel kan di tmeɣriwin i d-ttheggin yixxamen n yidles armi d iseggasen n 2018 d 2019 i d-yerna asuffeɣ n sin iḍebsiyen-nniḍen “Anida ddiɣ” akked “Yeḥzen 80”. Gar tezlatin icebḥen s wazal-nsent i yessekles ar ass-a, seg tid i iɛeǧben i wid t-iḥemmlen ad naf tizlatin “Yeḥzen 80”, “Lɣerba”, “Lvisa”, “Amuḍin”, “A Lwennas steɛfu”, taneggarut-a, d tajmilt i uɣewway Matoub Lounes. Tura yettkemmil unaẓur deg waṭas n tuzzyiwin yal mi ara as-d-ssawlen neɣ mi d-yella usiher adelsan.
Kh. A