Mazal, ar ass-a, ulac d acu i ibedlen deg sbiṭer n tarrawt n Terga Uzemmur segmi yettwaldi deg useggas n 1990. Γas ma yella rezzun-d ɣuṛ-s seg yal amḍiq n twilayt, tikwal ula seg beṛṛa-is, ameεna liḥala-ines ur telli d tin yeṣṣefṛaḥen. Ad d-nesmekti d akken sbiṭer-a, mačči kan i tarrawt n tullas, meεna i udawi n lehlakat i icudden ɣer tmeṭṭut s umata, am waṭṭan n uxenzir n lwelda, d yidmaren. S unamek-nniḍen, tullas yettdawin deg-s, ḥwaǧent aḥader, d usayes, mačči d astehzi ideg llant tura. Seg yiwet n tama, ur ufint ara tullas timuḍan iman-nsent dinna, acku addad n temεict yexṣeṛ mliḥ. Amedya, win n tguni. Imi deg yiwen n umeṭṭraḥ, gganent armi d ukuẓ n tullas.
Rnu i waya, ssemliliyen deg yiwet n tzeqqa, tid yurwen, tid i ixedmen apaṛaṣyun, d tid yettεassan ad -telḥeq nnuba-nsent ad cerrgent. Ula d naddam ur tezmir yiwet ad testaεfu, imi yeṭṭuqet umeslay di tzeqqa. Mebla ma nettu tuččit i d-ttaken i yimuḍan, imi mačči d ayen yezmer ad yessebleε yiwen. Seg tama-nniḍen, tezdeg iɣab yisem-is deg wadeg-nni, ama d taduli, ama d abduz. Ula d beṛṛa n sbiṭaṛ ur yeslik ara. Dɣa ur zmirent tullas ad ldint ula d ṭṭwiqan, yuɣ lḥal tfuḥ lḥala.
« Limer teḥbes temsalt dagi, yezmer yiwen ad yesbeṛ », i aɣ-d-tenna yiwet n tmuḍint i d-yekksen aculliḍ( kyste ) seg lwalda-s, imi i nesteqsa ɣef uswir n uxeddim deg sbiṭer, dɣa tkemmel deg wawal-is tenna-d: « qqimeɣ acḥal n wakud, ttεessaɣ nnuba-w ad telḥeq, i wakken ad cerrgeɣ. Meɛna imi i d-yelḥeq wass-nni, ayen i sεeddaɣ yugar leqṛiḥ n waṭṭan. Nekk ad tεeggideɣ, tifremliyin, yiwet ur d-trezzu ɣuṛ-i. Ula mi ara ad d-yelḥeq lawan i wakken ad wteɣ tissegnit n ussenqes n ṣṣṭer, d tid yuḍnen i yettṛuḥun ttḥellilent deg-sent i wakken ad d-ṛuḥent, amzun ur yelli d axeddim-nsent. Ma yella d amsujji, iεedda-d ɣur-i ala yiwet n tikkelt».
D tidet, amḍan n tullas i d-irezzun ɣer sbiṭer n Terga Uzemmur d ameqqṛan, yerna aneggaru-a ur yezmir ad yerfed buhan, lameεna ayɣeṛ ur d-rennun ara yimḍebbṛen i teεna temsalt sbiṭarat-nniḍen, ahat ad yenqes leḥṛis ɣef yimuḍan ?
K. K.