Accueil Tamazight Sendiḍelli i yessuli usileɣ amezwaru ɣef usbeddi n usenfar

IXELWIYEN Asileɣ n tddukkliwin tidelsanin di 4 n taɣulin : Sendiḍelli i yessuli usileɣ amezwaru ɣef usbeddi n usenfar

70
- PUBLICITÉ -

Taggara n ddurt-agi iɛeddan, i d-tella temlilit tamezwaut n usileɣ n yiɛeggalen n umussu aduklan, i d-tger s annar tddukkla Tadelsant “Itri Uzekka” n taddart n Yixelwiyen. Timlilit-agi n usileɣ tamezwarut, tella-d ɣef usbeddi n usenfar aduklan, i izemren ad d-yawi tadrimt i texriṭ n tidukla. D aduktur Cennan Arezqi, aselmad n tesdawit n Tizi Uzzu, i d-yellan ɣef lmendad n usileɣ-agi, i d-yeḍran ussan n 04 d 05 deg waggur-a n tuber ideg nella. D tagnit ideg i d-yemmeslay Mass Cennan, ɣef yiswan n usenfar aduklan d wamek i d-yewwi ad yili neɣ ad yettwaxdem. Yefka-d diɣ aṭas n yiwellihen i yiɛeggalen n tddukkliwin tidelsanin yellan dinna, i wakken, tamezwarut, ur xettren ara deg usenfar neɣ ur tettengar ara tddukkla-nsen, imi ur ilaq ara ad telhu kan yid-s. Tis snat, amek i zemren ad ssiwḍen ad salin asenfar-agi-nsen. Sya ɣer da, yettili-d uskasi gar-asen, ideg i d-yessefham ugar Mass Cennan, anida i d-yettak imedyaten seg tirmit-is netta, imi aṭas n tddukkliwin iwumi yeḍfer asenfar-nsent. D iɛeggalen n tddukkliwin tidelsanin n tama-agi n At Ɛissa Mimun i iḥeḍren asileɣ-agi amezwaru: gar-asen wid n tddukkla tadelsant “Imnar n Tdukli”, wid n tddukkla tadelsant “Itri Uzekka, wid n tddukkla tadelsant n Uxxam n yilmeẓyen Dib Ali ɣer tama n yimdanen-nniḍen n tmetti taɣurimt. D Axxam n yilmeẓyen Dib Ali n At Ɛissa Mimun i d-yesdurin timlilit-agi tamezwarut n usileɣ, am wakken yetturaǧu ad d-inlint deg-s tiyaḍ akka kra n wussan. Ma ɣef yiswi n tmelilit-a tamezwarut n usileɣ, yenna-d Mass Bedrani Amar, aselway n tidukla “Itri Uzekka”: “Iswi-nneɣ nekni s usileɣ-agi, d aɛiwen n tddukkliwin iqeddcen deg unnar, i wakken ad sbeddent isenfaren-nsen akken iwulem lḥal. D awelleh-nsen daɣen ɣer teɣbula-nniḍen iseg zemren ad d-skecmen tadrimt. I wakken diɣ, ad nefk i leqdicat-nneɣ udem ussnan, ad nexḍu i cḍeḥ werdiḥ…”.

- PUBLICITÉ -

Mazal yettkemmil wahil n tidukla

Mazal yettkemmil wahil n tddukkla tadelsant “Itri Uzekka” alamma d taggara n useggas-a ideg nella. Mazal tlata n temliliyin n usileɣ, deg tlata n taɣulin yemxalafen, ara d-yilin deg wussan i d-iteddun. Asileɣ wis sin, ara d-yilin ɣef useḥbiber n twennaḍt. Ad yeḍru ussan n 14 d 15 unbir 2019 i d-iteddun dima deg Uxxam n yilmeẓyen Dib Ali. Ad d-yawi awal deg-s uduktur Cennan Arezqi, ɣef usentel-agi: “Asegmi n twennaḍt i lmend n unegmu idummen”. D tagnit ideg ara d-yefk umsileɣ n temlilit-a iwellihen d wamek i ilaq ad nseḥbiber ɣef ugama ideg nettidir. Mi yessuli usileɣ-agi n sin wussan, yetturaǧu ad tili tuffɣa s annar, ara d-yilin ɣer tkebbanit n usefreg n yiḍumman “Aluverplast”, i d-yezgan deg Tala Ɛetman. Ma d asileɣ wis kraḍ, ad d-yili ussan n 01 d 02 duǧamber 2019, tikkelt-agi ad yili usileɣ n umussu aduklan ɣef umnir n tikli deg udrar (randonnées). D Mass Lewnis Touati, d aɛeggal n tddukkla n twennaḍt Gurara, ara d-yilin ɣef lmendad n usileɣ-agi. Am wakken diɣ, i yetturaǧu ad d-tili tuffɣa s adrar deffir kan n usileɣ-agi, i wakken ad d-yili usnas deg unnar n wayen xedmen deg usileɣ-a n sin wussan. Asileɣ aneggaru, ad yili d asuffeɣ n tanant n tsellak timenza (secourisme), ara yeddun ɣef tegzi n waggur. Ad tebdu ass n 15 unbir, ad tessali ass n 15 duǧember 2019. D Mass Ali Xeddam, imsileɣ aɣelnaw n tsellak timenza u d aselway n waggur azeggaɣ azzayri n tama-a n At Ɛissa Mimun ara yilin d imsileɣ n tanant-agi n secourisme.

A. A.

- PUBLICITÉ -