Accueil Tamazight Si tezɣent tasertant ɣer tezɣent tadamsant

Tamurt n Lezzayer mbeɛd 17 n lǧemɛat n tikli

Si tezɣent tasertant ɣer tezɣent tadamsant

52

Mazal ttkemilent tmesbaniyin n talwit, i d-yettilin yal ddurt seg 22 yebrir ar ass-a. Mbeɛd tinna n yisdawanen i d-yellan ass-nni n ttlata deg ddeqs n lwilayat n tmurt, tella-d lǧemɛa tis 17 n tikli deg tuget n tamiwin n tmurt n Lezzayer. Asuter d yiwen, d aqleɛ n udabu amesbaṭli s yiẓuran-is d lebni n Tegduda tazzayrit tis snat neɣ ɛad tamezwarut.

Ulamma, llan akka kra n wudmawen i wwin ɣer lḥebs n Lḥerrac, maca annect-a ur yesteqneɛ ara aɣref azzayri, i d-itteffɣen yal ass n lǧemɛa. Acu kan, mazal umuɣ n wid ilaq ad ttuḥasben meqqer. Gar wid ssuturen ass-nni n lǧemɛa d aselway aqdim n tmurt n Lezzayer, Ɛebdelɛaziz Butefliqa d wiyaḍ.

Aṭas n yimesbaniyen, i d-yennan belli tarbaɛt-agi n leḥkem tebɣa ad terr tazɣent-agi tasertant tettidir tmurt ɣer tezɣent tadamsant, ara d-yeglun s txeṣṣarin ɣef tdamsa n tmurt. Imi ɣef leḥsab-nsen, annect-agi ad d-yekk s uḥbas n yimɛelmen-agi imeqranen Rebrab, Ali Ḥeddad d wiyaḍ, i yessedduyen tikebbaniyin meqqren deg tmurt n Lezzayer. Ad yili wannect-agi, sya d afella mi ara neḍrurant mliḥ tkebbaniyin-agi, dayen ara d-yeglun s lemḍerra ɣef tdamsa n tmurt d unqas n uxeddim.

Amedya, deg tkebbanit n ugraw n Ḥeddad, yetturaǧu ad ttwaḥebsen wazal n 100 n yixeddamen deg wussan i d-iteddun, am wakken daɣen ara yesdukkel snat n tiliẓriwin yesɛa i wakken ad uɣalent d yiwet, dayen ad d-yawin astixer n kra n yixeddamen daɣen.
Gh. A.