Atas i d-yeffɣen d idlisen ɣef uɣewwaɣ Lwennas Meɛtub, seg useggas n 1998 d tasawent. Tuget nyimeskaren-nsen, d imaruyen i yuran yakan kra n yidlisen, neɣ d iqriben n Lwennas Meɛtub, akka amuletma-s Malika d tmeṭṭut-is Nadya. Adlis aneggaru I d-yeffɣen am tesleḍt ɣef umennuɣ d yisefra n Meɛtub Lwennas, yura-t mmi-s n tɣiwant n Tsexriwt, Hebbac Yasin, i yellan d amedyaz d amaru, s uzwel n «Matoub Lounes, le chemin vers le mythe». Send-is s kra n wussan, newwi-d awal deg yisebtar-a ɣef tektabt n Teyyeb Iqubac, neɣ Ɛebdelli, mi d-yessaẓreg adlis-is iwumi yefka azwel: «Matoub Lounès : Notes et souvenirs d’un compagnon de lutte».
Caḍen yimuranniḍen i d-yewwin tasleḍt, tanaga, neɣ d tamuɣli-nsen ɣef Meɛtub Lwennas amdan, amedyaz-acennay, neɣ agrawliw, am Muḥemmed Gaya i yuran «Anazbay». Ilaq ad d-nini d netta i yuran adlis amezwaru ɣef Meɛtub Lwennas s teqbaylit. Seg wid yuran daɣen, yella Yalla Seddiqi i d-yessuffɣen adlis «Mon nom est combat» ideg nezmer ad naf isefra n mmi-s n Tewrirt Musa. Ɣef wawal n umeskar, ula d Lwennas Meɛtub s timmad-is iwelleh-it di tudert-is akken ad yaru isefra war tuccḍiwin n unamek. Newwi-d daɣen deg Uɣmis-a n Yimaziɣen isalli n tuffɣa n udlis n umaru-aneɣmas Yusef Zirem, i isemma: «Matoub Lounès, la fin tragique d’un poète». Deg-s, akken i aɣ-d-yenna, yewwi-d kra n tnagiwin i ur nettwassen sɣur buhan n medden. Ddeqs I mazal seg wid i yuran idlisen ɣef Meɛtub Lwennas, garasen iberraniyen. Aya, war ma nebder-d ikatayen d tezrawin isdawanen i iweɛren ad ten-neḥseb. Ula d tisɣunin, caḍent tigad i d-yeffɣen ɣef Meɛtub Lwennas, taneggarut-is d tinna n Useqqamu unnig n Timmuzɣa I d-yeffɣen deg yunyu yezrin.
M. K.