Win yerzan ɣer At Smaεel ussan-a, ad yaf imezdaɣ-is ttmeslayen ɣef yiwen usentel kan. Ayagi, imi ayen yeḍṛan di tɣiwant-a, yessexleε-iten nezzeh, yerna d tikkelt tamezwarut i as-ḥeḍṛen warraw n tɣiwant-a. Tennulfa-d tedyant di taddart n At Tεisiwt, anda i yeẓdem umcic amṣuḍ (enragé) ɣef yiwen n urgaz, icerreg-as ula d lqecc-is. Imir-n dɣa, wwin-t ɣeṛ sbiṭeṛ. Dinna, wekkden-asen-d yimsujiyen belli amcic-a, yeṣṣeḍ. Daymi i as-ilaq i umdan-a, ad yewwet tissegnatin mgal aṭṭan-a yal ass, armi mden 40 n wussan. Ad d-nesmekti d akken, deffir n urgaz-a, azal n 6 n yimezdaɣ i yettwaḥuzan. Gar-asen, llufan amecṭuḥ bu 4 n yiseggasen.
Ula d iɣeṛṣiwen dɣa, ur sliken ara seg umahi-a. Gar-asen yiwet n taɣadt i yeclex yiwen seg yimcac-a yeṣṣḍen. Ayen yeḍṛan, yezreε tugdi deg wulawen n yimezdaɣ n temnaḍt-a, ladɣa ibabaten n warrac i yugaden ɣef dderya-nsen imecṭaḥ. Γas ma yella teddun yid-sen ɣer uɣerbaz, besseḥ amahi ur yelli ara deg ubrid kan.
Γef usentel-a, tenna-aɣ-d yiwet n tyemmat : » Mmi, asegga-a i yekcem ɣer uɣerbaz, ur yezmir i yiman-is εad. I ma yella imcac-a, kecmen ɣer uɣerbaz? ur ilaq ara astehzi deg temsal-a, ilaq-as tifrat s uɣiwel « . Seld kra n yisragen segmi i teḍṛa temsalt, wwḍen yisallen i tuddar-nniḍen n tɣiwant. Neɣ s unamek-nniḍen, d asentel-a i rran medden d ccɣel, acku ikcem-iten-id ukukru d lḥir. D ayen i yeǧǧan aselway n tɣiwant yennejmaε d yimezdaɣ n taddart n At Tεisiwt, ddmen ṛṛay belli ad nɣen imcac-a s tazzla.
Imi ur zṛin ara d acu d tamentilt armi i yuɣalen d imṣaḍ. Meḥsub yeṭṭuqet umeslay ɣef tmentilin i izemren ad tili. Wagi yeqqaṛ d wid yettidiren deg ugudi i yuḍnen. Wayeḍ yeqqaṛ mačči yakk d imcac n taddart, lameεna yella win i ten-id-iḍeggṛen si tuddar-nniḍen. Di leεḍil ad d-tban tidet, nessaram-asen ḥellu i wid yuḍnen, ma d wid-nniḍen yewwi-d fell-asen ad ḥadren iman-nsen.
K. K.