Yettuneḥsab waṭṭan n ssker di tallit-a, gar waṭṭanen yettcewwilen amdan s waṭas. Ɣas ma yella tessaweḍ tesnujjya ad t-teḥkem, wanag ineqq armi d amelyun d uzgen n yimdanen yal aseggas deg umaḍal. Di Tmurt n leqbayel, ɣef leḥsab n waṭas n tddukkliwin, yettzid umḍan n yimuḍan yal aseggas s tɣara i yessewhamen yal yiwen. Ama d amɣar, d alemmas, d ilemẓi neɣ d agrud, akk iḥricen-a n tmetti yettḥaz-iten waṭṭan-a n ssker, ɣas s ssebbat yemgaraden tikwal.
Dɣa, i lmend n wass amaḍalan n waṭṭan-a n ssker, 14 unbir, llant tddukkliwin i d-iheyyan ussan n usḥulfu d uɛeyyer ɣef waṭṭan-a i yuɣalen d anezgum di tudert-a tatrart. Yelha ad d-nini d akken ayen iɣef ttwessin yimsujjiyen s umata bac ur iteṭṭef yiwen aṭṭan-a, d tagella tuqɛidt (équilibrée), yexḍan cwiṭ i ssker aragaman, akked waṭas n uḥerrek neɣ n waddal. Ɣef wawal-nsen, amili i malen yimdanen ɣer lgazuz d yingulen, yella gar tmentilin i d-yewwin aṭṭan-a. Rnu-as daɣen ccyaḍa n uksum d tassemt ɣur kra, imi ur xeddmen addal, ur leḥḥun annect i ilaq ad yelḥu umdan deg wass.
Ilaq ad d-nebder taluft n unqas n warmud n kra n tddukkliwin i yennumen ssuddusent-d kra yal ass amaḍalan n waṭṭan n ssker, acku kksent-asen akud i yiɛeggalen-nsent tekliwin timalasin n ugdud i d-yettilin yal sem. Taggara, yewwi-d ad d-nesmekti d akken tikwal ur seḥḥan leḥsabat ara i d-ttakkent tddukkliwin d yisɣuren n tdawsa n da d din. Acku, ugar n yimuḍan ur nettuneḥsab akken, meḥsub ur ttwajerrden ara, imi ssenf n waṭṭan-nsen d afessas, llan ahat d igiman n yimdanen i yesɛan ssker maca ur ẓrin. Ɣef usentel-a, ttnebbihen yimsujjiyen ɣef wazal n uɛeyyer deg teklinikin d tzeɣwa n tdawsa s umata.
M. K.