Accueil Tamazight Ssuturen yimezdaɣ rrwaḥ n uselway n tɣiwant

Tizi n Berber

Ssuturen yimezdaɣ rrwaḥ n uselway n tɣiwant

53

Seg yiseggasen yezrin i llan yimezdaɣ mgal aselway n tɣiwant n Tizi n Berber, ladɣa, imi ddeqs-aya d netta i yellan ɣef tecwawt-is, yerna ulac d acu i asen-yexdem ɣef leḥsab-nsen. Seg tama-nniḍen, yella ugraw n yimezdaɣ i yeddan yid-s, sbedden-t-id d aselway. Lameεna ayen i nwala ussan-a yezrin, ula d ineggura-a bedlen ṛṛay-nsen. Ayagi imi i d-yeffeɣ mgal wayen i ssuturen yimdanen-a. Tadyant-a, tennulfa-d mi ẓṛan yimezdaɣ n tɣiwant-a belli lmir-nsen yeqbel tifranin i d-iteddun.

Rnu ɣer waya, tamuɣli n warraw n temnaḍt-a tban, acku ugin ad tekkin deg-sent. Meḥsub, aselway i d-sbedden nutni ur iquder ara tutlayt-nsen. D ayen i ten-yeǧǧan bellεen Axxam n tɣiwant ass n, 3 unbir yezrin, i wakken ad ṣṣiwḍen ṣṣut-nsen i uselway n tɣiwant, ahat ad ibeddel ṛṛay-is. Ayen yernan i tmes lḥamu ɣer yimezdaɣ, d tuffɣa s wacu i d-yeffeɣ lmir-a, dɣa yugi-asen ad d-ssufɣen lekwaɣeḍ-nsen seg tɣiwant. Γef leḥsab n teɣbalut-nneɣ, ur leḥḥunt ara temsal akken iwulem deg tɣiwant-a ussan-agi, acku mgaradent tektiwin ula gar yimezdaɣ.

Ad d-nesmekti d akken, dderya n Tizi n Berber, εewwlen-d ad kemmlen abrid n umennuɣ-nsen, alamma wwḍen ɣer lebɣi-nsen. Γef usentel-a yenna-aɣ-d yiwen :  » Ulac tuɣalin ɣer deffir, amennuɣ mgal adabu ameṣbaṭli yettkemmil, ihi d awezɣi ad neqbel tifranin deg tɣiwant-nneɣ ».

K. K.