Taddart n Ifouzer, d yiwet seg 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi, yellan di dayra n Ouaguenoun. Taddart-agi, mazal ar ass-a n wussan, tettidir, iseggasen-agi ineggura, lexṣaṣ d ameqqran deg yiḥricen d yisenfaren yemgarden n tudert tartar, gar-asen: ttawil n Internet, yir liḥala n yiberdan, imḍiqen i yilmeẓyen akked uɣbel n waman n tissit, trisiti …atg. Acu kan tikkelt-agi, kkren-d yimezdaɣ n taddart-a i wakken ad ssutren azref-nsen i ttraǧun acḥal-aya. Aɣbel iɣef i d-kkren yimezdaɣ n taddart-a, d aseggem n ubrid ameqqaran n taddart. Aneggaru-a, yeqqnen gar Tizi n Tagouma (Akaoudj) d taddart-agi n Ifouzer, i ittekemmilen alamma d taddert n Manaam, ha-t-an deg yir liḥala.
Niqal deg useggas n 2013 i d-yeffeɣ usenfar n ubrid-a, imi teffeɣ-d tedrimt-is, maca mazal ur yettwaxdam ara. Di tazwara, ufan-d ssebba s usekcem n lgaz n temdint, yuɣal nnan-asen ad nexdem kan azgen deg-s, maca ar tura ulac d acu yettwaxedmen. Xas ulamma deg useggas n 2018 i d asen-yefka aṛeggem Useqqamu aɣerfan aɣiwan (APC) n Ait Aissa Mimoun, maca ulac d acu i d-ibanen. Mbeɛd sebɛa n yiseggasen n uraǧu, ɛebblen-d yimezdaɣ n taddart-agi i uɣlaq n uxxam n tɣiwant n Ait Aissa Mimoun. Yella-d uɣlaq-is i wugar n ddurt tura, ttellin-tt sya ɣer da akken ad xedmen yimezdaɣ n tɣiwant-a lecɣal-nsen. Ma d iḍelli n lḥed, 06 cutember 2020, kemmlen ɣelqen daɣen asɣim n dayra n Ouaguenoun, yellan di Tikobaine. Ɣef wakken i t-id-nnan yimezdaɣ n taddart-a, ad ikemmel uɣlaq-agi alamma bdan lecɣal n uɛiwed n ubrid-a, yesɛan ma aṭas 2,8 ikilumiṭren.
Adaoun Abdel Ghani