Addad ur nelhi ideg yella sbiṭar n Uqbu Aqlul Ɛli seg wacḥal n yiseggasen-aya. D tidersi n ttawilat d wuguren ttmagaren yixeddamen-is i yessawḍen ineggura-a ad d-beggnen lɣiḍ-nsen s usuter n uṭixer n uqerru amzwaru n sbiṭar.
I lmend n waya, heggan-d yiwen n yibeddi meqqren, deg yimalas iɛeddan, sdat n tewwurt n unekcum anda i ḍelben ad frun yisuturen-nsen s lɛejlan, imi ɛlaḥsab-nsen d anemhal Mass Ɛ. Kechah i d tamentilt tamezwarut deg wayen akka yettidiri sbiṭar-a. Dɣa, gar-asen ad d-nebder lqella n tezdeg i d-temmuger tdersi n ttawilat i uḥareb n waya, asexdem n maḥyaf gar yixeddamen sɣur anemhal-a. “Aḥric ameqqran n yixeddamen, ssuturen rrwaḥ-ines, acku segmi i d-yusa deg 2015 ɣer sbiṭar-a, simmal yettuɣal ɣer deffir.
Icemmet ula d udem n temdint meqqren am Uqbu. Uɣalen yimuḍan, ttkukrun ad d-rzun ɣer da, ma nwala qrib ulac maḍi ttawil n udawi”, i d-yenna yiwen n ufremli. Seg tama-s anemhal-a, yemmeslay-d ass-nni n lexmis deg yiwen n usebter deg uẓeṭṭa inmetti, s yiwet n tifert i tifrat n lumur, yenna: “D tidet, llan cwiṭ n wuguren, maca mačči akken i ten-id-sbeggnen wid icetkan, acku deg unnar aṭas n lumur i ileḥḥun akken ilaq. Ur ntettu ara daɣen belli sbiṭer n Uqbu meqqer, yeṭṭef amḍan n 300 000 n yimezdaɣ yettwaferqen ɣef 15 n tɣiwanin d kra n tɣiwanin n twilayin i d-iqerben.
Anamek-ines, rezzun wazal n 8 000 n yimuḍan i waggur, neɣ 270 i yiwen n wass kan ɣer tesga n udawi s lɛejlan (les urgences). Ma d tifrat, ahat ad tili deg tullya i d-iqerben n sbiṭer n Tezmalt ara yesneqsen deg leḥriṣ-a i d-yettilin”.
Kh. A.