Accueil Tamazight Tεedda akken iwulem teɣlamt tasnujjyant

Iɣil Ɛli

Tεedda akken iwulem teɣlamt tasnujjyant

55

Tettkemmil tddukkla tinmettitadelsant « Tiɣra » deg ubrid n usmurres i d-tenjeṛ s lebɣi d tḥerci n yiεeggalen-is, d uselway-is ladɣa.

Tadukli d tegmat i yellan gar yiεeggalen, d yimeltaɣen-is, terra-ten d amedya igerrzen n tddukkliwin i ileḥḥun ɣer sdat. Dɣa, ula d lecɣal d yiqeddicen deg-s ur ḥebbsen ara. Ama deg uḥric n yidles, d usnerni n tmussni n yilemẓiyen d warrac imecṭaḥ. Ama deg yiḥricen-nniḍen i icudden ɣer useggem, d uqeεεed n yixemmimen n yimezdaɣ s umata. Daymi i d-thegga tddukkla-a ass n sem, 27 cutembeṛ yezrin, yiwet n teɣlamt tasnujjyant i ubaɣuṛ n yimezdaɣ n taddart n Tquṛṛabt, d tuddar n Yiɣil Ɛli s umata. Ddeqs n yimsujiyen i d-yerzan ɣer dinna, ama d win n tensujjya tamatut, amsuji uzzig deg waṭṭan n yiɣsan, win n warrac imecṭaḥ, amsuji n tuɣmas d wiyaḍ.

Ula d tullas, fkan-asent lḥeq-nsent, ayagi imi i d-wwin amsuji uzzig deg waṭṭan n uxenzir n yidmaren, i wakken ad d-sεedint tullas n tuddar, abeεda tid ur nesεi ttawilat ad rzunt ɣeṛ teklinikin. Ayen yessefṛaḥen ugar d amḍan n yimdanen i d-yusan, imi deg yiwen n wass kan εeddan 179, gar-asen ula d imɣaṛen, d warrac imecṭaḥ. Mebla ma nettu wid iwumi ur tettunefk ara tegnit ad ḥeḍṛen, dɣa sḥassfen aṭaṣ. Ad d-nesmekti d akken ur yelli d tikkelt tamezwarut i d-teḍṛa, dɣa wagi d ttiεad-is wis sin. Am wakken i nessaram ur yettili ara d aneggaru, acku imezdaɣ n tdayṛa n Yiɣil Ɛli, umren ayendin s ccɣel-a, i d-ixelqen acmummeḥ deg ulawen-nsen. Yecreh uselway n tddukkla-a d yiεeggalen-is imi iεedda ttiεad-a deg tegnatin igerrzen, daymi i snemmren imsujiyen d yifermliyen i d-yusan, akked tfaṛmasiyin « Ɛelluc », d « Lwani » i imudden ddeqs n ddwawi baṭel i yimuḍan. Am wakken i snemmren daɣen, tiddukkla n yimuḍan d yimeɣban « Ssuman » n Uqbu, i asen-d-yefkan afus n tallelt.

K. K.