Accueil Tamazight Taɣiwant n At Smaεel, gar tid i d-yewwin arraz

BGAYET Amsizwer n taddart zeddigen

Taɣiwant n At Smaεel, gar tid i d-yewwin arraz

119

Imi aseḥbiber ɣef twennaḍt, d tamsalt i aɣ-yeεnan akken ma nella, iberreḥ-d Useqqamu aɣerfan awilay n Bgayet, deg yennayer n useggas yezrin, ɣef umsizwer n taddart akked ugman zeddigen. Ineggaru-a, d tagnit i yettunefken i yal taɣiwant seg 32 n tɣiwanin n Bgayet, i wakken ad d-tesεen ccbaḥa d tezdeg n tuddar-is. Ad d-nesmekti d akken gar 32 n tɣiwanin-a, ttekkant 99 n tuddar d 14 n yigmamen. Ihi, seld 17 n tuffɣiwin n tseqqamut n yimezzurfa i yerzan ɣer tɣiwanin ittekkan.  Igemmaḍ n umsizwer-a, ttwaberrḥen-d ass n, 8 ṭuber yezrin. Anda i d-fernen semmus n tuddar, akked kṛaḍ n yigmamen zeddigen. I yisalli, d taddart n Ugemmun n At Ɛemmaṛ, seg tɣiwant Tawrirt Iɣil, i d-yewwin arraz amezwaru (500 n yimelyunen n yisantimen).

Ma yella seg tama n yigmamen zeddigen, seld Leqṣer, d tɣiwant n Tezmalt, taɣiwant n At smaεel seg tama-s, tewwi-d amkan-is deg umsizwer-agi. Imi, tusa-d deg umḍiq wis kṛaḍ, s waraz n 100 n yimelyunen. Arraz-a, yessefṛeḥ ama d aselway n tɣiwant, ama d imezdaɣ-is. Acku, d axeddim n yilemẓiyen iḥemmlen taddart-nsen, zgan d aseḥbiber fell-as, i d-yefkan igemmaḍ-is ass-a. D ayen i d-yenna Mass Sadeq rebbaεi deg wawal-is : « Ad snemmreɣ ilemẓiyen-nneɣ i d-yerran i tiɣṛi n usizdeg, zgan d aqeddic seg wacḥal-aya, i wakken ad d-tili taddart-nneɣ gar tid ifazzen.

D tidet, xuṣṣen nezzeh ttawilat, lameεna s tebɣest, d lebɣi i sεan, ṣṣawḍen beddlen udem n tɣiwant-nneɣ. Mebla ma ttuɣ aman n tddukkliwin n taddart i d-yeldin allen n yimezdaɣ ɣef wazal n tezdeg i twennaḍt. S yisem-iw, ttzuxxuɣ s yilemẓiyen-nneɣ, axaṭer d nutni i d asirem, ala  yis-sen i yezmer ad d-yili ubeddel. Am wakken ad snemmreɣ daɣen, Aseqqamu aɣerfan n Bgayet ɣef leqdic-a, imi, d ayen ara d-yawin abaɣuṛ i twilayt s umata. Neɣ s unamek-nniḍen, d asebɣes ara d-yefken igemmaḍ-is sya ɣer sdat’’.

K.K.