Accueil Tamazight Tacemlit n Yennayer, d abaɣur-nniḍen i tsekla

Ajdid deg tira

Tacemlit n Yennayer, d abaɣur-nniḍen i tsekla

263

Leqdic adelsan i yuɣalen ɣer deffir ɣef teɣzi n useggas-aya tura, ḥebsen yisaragen, timezgunin, timeɣriwin n ccna …atg. D aṭṭan-nni amcum i d ssebba, iger-d iɣallen i umaḍal, gar-asen tamnaḍt n Leqbayel. Maca akken yebɣu yili, mačči s wayen n diri kan i d-yegla imi lulent-d tigawin yelhan ; d tid yecban tallelt d uzeṭṭa n tegmat gar yimdanen. Tegla-d yid-s tallit-a ula s leqdic adelsan s wudem amaynut. Tira d tvidyutin deg uzeṭṭa inmetti i yuɣalen d ifri uɣur i d-ttemlilin wid ifuden idles d tira. Deg tallit-nni n lekmin i d-tlul yiwet n “Tcemlit”, d tin iwumi zdin iɣallen aṭas seg wid yettarun, iḥemmlen ad d-awin amaynut s tikta ur nettfakka. Dɣa tlul-d “Tcemlit n Tefsut Imaziɣen”, deg wayyur n Yebrir 2020, aggur kan, ḍefrent-d snat-nniḍen “D tajmilt i yinaẓuren Lwennas d Yidir”, d ticemliyin i d-yeffɣen deg wagguren n Mayu d Yunyu 2020, imi ulamek ara yili leqdic deg unnar, yella-d s ttawil-nniḍen, ur ixuṣṣ ara deg ubaɣur i swayes i d-yegla. D iḍrisen ilelliyen n tsekla, d tinagiyin, d isefra d wayen-nniḍen. Aṭas n yimura i yellan akka imir-a deg unnar-a i d-yerran i tiɣri.

Uran-d, sumren-d tikta-nsen, rran-d i teɣri i d-iger deg uzeṭṭa inmetti Facebook, Mass Remḍan Ɛebdenbi, d netta i iqeɛden iḍrisen, yerra-ten s talɣa PDF, iga-as-d unuɣen icebḥen, akken ad yeɛǧeb i yimeɣriyen. Ticemliyin yezrin, ulamek ara kfunt neɣ ara ḥebsent, ur d-gellunt ara s tayeḍ. Tagi  d “Tacemlit n Yennayer”, I lmend n umagger n yixef n useggas n Yimaziɣen 2971, iberreḥ-d daɣen win i d-yefkan tikti, imi Yennayer n useggas-a ur d-yelli ara s tuget deg unnar, ɣef tmentilt n waṭṭan-nni dima, ayɣer ala ur yettili ara s tikti-nniḍen. Leqdic i yetturajun ad yuɣal ɣer udlis s talɣa PDF, ad yewjed i wusan i d-iteddun. Deg-s ad naf aṭas n yiḍrisen n yimura i d-yerran i teɣri. D taḥawact n yiḍrisen ilelliyen ɣef Yennayer, ɣef Cacnaq, ɣef umezruy d useggas amaynut 2971. Ad ilin yisefra iqburen, awal n tyemmat, tigemmi, tikti, asumer, tamuɣli d rray aḥerfi. D leqdic ara yilin gar yifassen-nneɣ, d win kan i ibanen ad d-yernu amur-is n ubaɣur i yidles Amaziɣ.

 Aɣerbaz deg usiher i usfugel n Yennayer «2971»

Ɣas qrib aseggas segmi yeḥbes leqdic adelsan s taɣulin-is yakk, aṭṭan n covid-19 mazal ur yeffiɣ ara seg umaḍal n talsa s wudem unṣib, mazal akukru, d netta i d tamentilt yerran idles ɣer deffir, deg tallit-is yenqeṣ leqdic.

Maca s tisin d umager n yixef n useggas n Yimaziɣen, ulamek ara zeglen Leqbayel d Yimaziɣen asiher ameqqran am Yennayer. D aneḍruy i d-yettuɣalen s tumert yal aseggas, d win umi ggaren iɣallen Yimaziɣen s tuɣalin ɣer laṣel d ucuddu deg tnekkit.

D annect-a i yeǧǧan ula d inelmaden d yiselmaden, imasayen d yinemhalen n yiɣerbazen s kraḍ n yiswiren ad gen leqdicat yemxalafen ɣef teɣzi n yimalas, ladɣa segmi i d-tceyyeɛ teɣlift n usedwel ulɣu i wakken ad d-yili usfuggel n uneḍruy-a. Nwala-d ama deg yizeḍwa inmettiyen, ama di kra n tiliẓriyin, leqdicat idelsanen i d-yellan ilmend n waya ; d ccna, d amezgun, isefra, inzan, tiwin d usenɛet n tɣawsiwin tiqburin i icudden ɣer wansayen n lejdud, tuččit yemgaraden i d-yersen deg yimraḥen n yiɣerbazen, talusi n tqendyar d teksiwin i teqcicin d yiqeccabiyen d yibrenyas i warrac.

Ur ilaq ara ad yettwasfugel Yennayer s wudem afulkuri

Ayen i as-yernan deg wazal i Yennayer deg uɣerbaz, d akken iselmaden ur ttun ara tigin n temsirin n umezruy n Yennayer, d usefhem i yinelmaden anamek d tmentilt d wacu uɣur icud umenzu n Yennayer, akken ur yettɣimi ara di ccḍeh kan d ccna, neɣ s unamek-nniḍen s wudem afulkluri. Akken, inelmaden ad ḥṣun s umezruy-is, ad ẓren belli tafada n Yimaziɣen d tin i icudden ɣer wakal, seg-s ay d-tettek tudert. Yal aseggas ad t-id-smektin, acku d inelmaden n wass-a i d imal n uzekka, wa ad tt-yeqqar i wa. D arrac n wass-a i d irgazen n uzekka, d wigi ara yawin asafu n yidles, n tgemmi, n tutlayt. Tasuta ad tesselmed tayeḍ, lǧil ad yerfed wayeḍ, aɣref Amaziɣ ɣer yiswi-s ad yaweḍ. 

Ɣabent tdukkliwin, yeḥḍer Cacnaq

Ɣas ma yella Yennayer n useggas-a, ur kkint ara deg-s s tuget tdukkliwin tidelsanin ɣef tmentilt n waṭṭan i d-yersen, d tewtilin i tent-icudden, maca llan-d wahilen ɣas d imecṭaḥ sya u sya, am tigin n usebdad ameqqran n ugellid Cacnaq di temdint n Tizi Wezzu. D win i mmugren yimezdaɣ n tmurt n Leqbayel s lferḥ, s tirza-nsen ɣer umkan d tuṭṭfa n tugniwin ar tama-s. D ayen i d-yessebganen azal n uneḍruy yecban Yennayer, i yettwasfugulen deg yiseggasen-a ineggura deg merra tamiwin n tmurt n Lezzayer akked tmura n Tefriqt Ugafa d tmura n lberrani, i usuffeɣ n tgemmi d yidles imaziɣen yellan d iqdimen n lqedma ɣer umaḍal.

Tacemlit n Yennayer, d abaɣur-nniḍen

Aṭṭan-a amcum i d-yegren iɣallen i umaḍal, gar-asen tamnaḍt n Leqbayel, mačči s wayen n diri kan i d-yegla. Imi lulent-d tigawin yelhan ; d tid yecban tallelt d uzeṭṭa n tegmat gar yimdanen. Tegla-d yid-s tallit-a ula s leqdic adelsan, tira tividyutin deg uzeṭṭa inmetti, i yuɣalen d ifri uɣur d-ttemlilin wid ifuden idles d tira. Deg tallit-a n lekmin i d-tlul Tcemlit, umi zdin iɣallen aṭas seg wid yettarun, iḥemmlen ad d-awin amaynut s tikta ur nettfakka. Dɣa tlul-d Tcemlit n Tefsut Imaziɣen, Tajmilt i yinaẓuren Lwennas d Yidir, imi ulamek ara yili leqdic deg unnar, yella-d s ttawil-nniḍen, ur ixuṣṣ ara deg ubaɣur i swayes i d-yegla. Armi i d-yewwi yid-s ula d Tacemlit n Yennayer ara yilin akka gar yifassen-nneɣ, d tin kan i ibanen ad d-ternu amur-is n ubaɣur i yidles Amaziɣ.

Khaled Achoui