Accueil Tamazight Taddart n Lɣaba, d amedya ɣef tddukkli n Leqbayel

Semεun

Taddart n Lɣaba, d amedya ɣef tddukkli n Leqbayel

111

Taddart n Lɣaba, d yiwet seg tuddar n Leqbayel i d-yezgan di tɣiwant n Semεun, tadayṛa n Amiẓuṛ. Taneggarut-a, ddukklen yimezdaɣ-is am yiḍuḍan n ufus, ttemεawanen gar-asen. Ayen i d-ijebden awellih-nneɣ, d ayen i xeddmen yilemẓiyen-is deg wayyur-a n Remṭan. Ayagi, imi msefhamen yimezdaɣ i wakken ad d-afen tifrat i wid ixuṣṣen, ur ṣṣawḍen ara ad d-aɣen ayen i yeḥwaǧen d tagella. Daymi i ldin tazeqqa n tddukkla Tafrara, jemmεen deg-s ayen i asen-d-yettelḥaqen d isufar n tgella. Akken qqaren‘’s ccbaḥa n wawal i ferrun medden timsal’’, am wakken i qqaren daɣen, ‘’awal ma wezzil yeččur d lemɛani’’. Ihi s tenfalit  » Ddem ma teḥwajeḍ, awi-d ma tebɣiḍ « , i d-sersen yimezdaɣ di tewwurt n tzeqqa, i wwen ɣer yiswi-nsen. S unamek-nniḍen, win ur neksib kra, ad d-yerzu ad yawi ayen iwumu yesra. Ma yella d win yessegran kra, neɣ yesεa, yebɣa ad yessufeɣ, ad t-id-yawi ɣer tzeqqa-nni. Ad d-nesmekti d akken, tigawt-a, tessmurres akken ilaq, yerna teṣṣefṛeḥ deqs n wid yellan di lexṣaṣ. Rnu i waya, teldi tiggura i wid yebɣan ad xedmen lxir. Seg tama-nniḍen, aẓawali, xeṛṣum ad yidir taswiεt-a anda i qessiḥ tiyita mebla akukru, ladɣa wid i yeṣṛuḥen axeddim-nsen deg lawan-a n ukman. Di taggara, nessaram ad defṛent tuddar-nniḍen abrid n taddart n Lɣaba.
K. K.