Ulamma aḥric n yiberdan deg tɣiwant n Ayt Smaɛel, 65 n yikilumitren ɣer Unẓul-asamar n Bgayet, yella di yir aswir deg wayen iɛeddan, nezmer ad d-nini yebda yettseggim iseggasen-a ineggura ɣef wakken i d-iban lḥal deg unnar. Dɣa, tekker tɣiwant n Ayt Smaɛel i uselsi n yiberdan igejdanen, akken ad tḥaz aredqal wid ibeɛden cwiṭ, neɣ ur ten-sseqdacen buhan n yiɣermanen. Ma nemmeslay-d ɣef ubrid aɣiwan n Tecruft, i yellan seg wid i ssuturen yimezdaɣ s nezzeh, ussan-a kan i d-yella ukemmel n tduli-s s umɛiwen akked tɣiwant tanaragt n Tsexriwt.
D acu, yeqqim-d akka tura ahat wazal n ukilumitr urɛad yemmug. Seg yiberdan n tɣiwant i yettwareqqɛen daɣen s ubiṭun n ubitum, yella winna n Cctel. D ayen i d-yewwin ayendin d tumert i yimezdaɣ n temnaḍt-nni, abeɛda wid ixeddmen takerza. Ddurt yezrin daɣen, tres tduli tamaynut ɣef ubrid aɣelnaw n Tisira, i d-yettawin armi d abrid awilay wis 06. Ariḍa, yetturaǧu ad d-ilin ussan-a lecɣal-nniḍen n ureqqeɛ deg yiberdan-nniḍen i useggem ugar n uẓeṭṭa n yiberdan deg Ayt Smaɛel. Seg-sen, ad d-nebder abeɛda win iɛeddan seg Usyal ɣer ubrid n twilayt wis 06, abrid n Bucayeb-Burafaɛ akked ubrid n Tizi Lexmis-Tala Ɛnan.
Ɣef wawal n uselway n tɣiwant n Ayt Smaɛel, Mass Sadeq Rebbaɛi, usan-d deg wakud iwulmen yisenfaren n useggem n yiberdan, abeɛda imi aṭas deg-sen i yeqburen, neɣ i ten-yuɣen seg yiqeddicen n uẓeṭṭa n usiweḍ n ugaz. « D ayen ara aɣ-d-yawin kra n utthenni n uqerruy mi ara texdem tɣiwant abrid-nneɣ. Imir-n xersum, ama s uḍar neɣ s tkerrust, ad kksen wuguren i d-nettmagar deg-s », i d-yenna yiwen n umezdaɣ.
M. K.