Ass-nni n ssebt, 12 deg cutember i deg-i nella i as-tuɣal tejmilt i yiwet gar tgejda n uẓawan n temdint n Tizi Uzzu, deg Uxxam n yidles Mulud Mɛemmeri. Wagi d Amar Dris i yellan d amẓawan mechuren deg uḥric n ccna, ladɣa ssenf-agi n Andalus imi i d-yexleq deg useggas 2007 tarbaɛt El Amraouia n temdint n Tizi Uzzu i yewwin sin warrazen deg temsizzelt n uẓawan n Andalus iseggasen n 2012 akked 2013 i d-yeḍran deg Lezzayer tamanaɣt. Yemlal Amar Dris d waṭas n yinazuren akked yicennayen mechuren n Ccaɛbi, n Ḥawzi, n Adalus akked n teqbaylit. Gar-asen Guerouabi, Dahmane El Harrachi, Boudjemaâ El Ankis, Abdelkader Chercham, Mohand Said Oubelaid, Taleb Rabah d wiyaḍ.
Yella d amẓawan deg terbaɛt n Teseqqamut n tmeɣriwin n temdint n Lezzayer. Mi d-yuɣal ɣer temdint n Tizi Uzzu, yesselmed aẓawan deg Uxxam n yidles Mulud Mɛemmeri anda i d-yessuffeɣ aṭas yimẓawanen. D netta diɣ i yellan deg lmendad i ucennay Samy El Djazairi armi yewweḍ ɣer tqacuct deg ccna. Ihi, tuɣal-as tejmilt sdat n waṭas n yimeddukkal-is, n yinelmaden-is akked yiɛeggalen n twacult-is deg tzeqqa tameqqrant n Uxxam n yidles Mulud Mɛemmeri anda i d-yurar s wallal n uẓawan akked terbaɛt-is El Amraouia yiwet n tezlit n unelmad-is Rachid Bilek. Ilul Amar Dris assn, 23 deg yebrir 1943 deg Ɛin Ḥelluf, deg temdint n Tizi Uzzu. Yeɣra deg uɣerbaz amenzwaru Jeanmaire, syin ikemmel deg uɣerbaz alemmas. Yunag ɣer Lezzayer tamanaɣt anda yexdem deg Teɣlift n yimjuhad. Mbeɛd mi yekcem Tanmehla n yilmeẓyen d waddal yeḍfer diɣ aḥric n uẓawan s umata.
Hocine Moula