Accueil Tamazight Tajmilt i ucennay Arezki Rawes

Agouni Hamiche - Udem gar wudmawen

Tajmilt i ucennay Arezki Rawes

88

Rran yilmeẓyen n taddart Agouni Hamiche tajmilt i unẓaru ameqqran, i d-tefka taddart-nsen, wagi d Arezki Rawes, i d-yefkan aṭas i tezlit taqbaylit acḥal d aseggas. Tella-d tejmilt-agi tameqqrant, tamaddit n wass-nni n ssebdt, 02 unbir 2019, deg unnar n Uxxam n yilmeẓyen n tama-agi. Yella-d wahil d anesbaɣur i lmend n usmekti wis 32 n tmettant-is. Tella-d tmeɣra n ccna, ideg ccnan ddeqs n yicennayen i d as-yerran tajmilt, yal wa akken iwɛa. Llan wid i d-yecnan tizlatin-is, llan wid i d-yecnan tizlatin-nsen i wakken ad t-id-smektin yis-sent. Gar yicennayen i d-yecnan, ad d-nebder: Karim Khelfaoui, Mouh Oubelaid, Youcef Guerbas, Madjid Fahem, Hocine Azar d wiyaḍ.

Am wakken diɣ i tettunefk tegnit i tnagiyin ama sɣur yicennayen-a neɣ sɣur yimeddukkal-is-nniḍen. Ula d anecraḥ, yuɣ amkan-is di tejmilt-agi, imi yella di ttiɛad uzeffan Rabah Boujaoud, i d-iseḍsen kra yellan din s teḥkayin d teqsiḍin i d-yewwi d aɛwin. Am wakken i d-yella umeslay ɣef tudert d umecwar n ucennay-agi i iruḥen d ilemẓi. Arezki Rawes, ilul s yisem-is aḥeqqani Arezki Chabli deg useggas n 1965 di Tala Bouzrou di dayra n Makouda. Tasfiftit-is tamenzut, teffeɣ-d deg useggas n 1985, ma d tis snat deg useggas n 1987, tlata wagguren mebɛed tamettant-is. Ass n, 27 tuber 1987, teḍra yiwet n twaɣit n ubrid, i d-yeglan s tmettant-is netta d tlata n yimeddukkal-is, deg leɛmer-is ala 22 n yiseggasen.

Yecna ɣef tayri, ɣef tudert, ɣef usirem d tirga n umdan. Gar wayen i d-yeǧǧa, ad d-nebder tizlatin-agi: siweḍ-as sslam, Taqcict n ɛecrin, Ini-as ay aḥbib ini-as, Tabrimt n lfeṭṭa, Ax ul-iw a llala…atg. Yettwamḍel deg tmeqbert n taddart-is deg Agouni Hamiche di Tala Bouzrou.

A. A.