Accueil Tamazight Tala yexla ustehzi deg tɣiwant n Tizi !

TALA ATHMANE - Isenfaren, ayendin,meɛna kullec yeqqim din ! : Tala yexla ustehzi deg tɣiwant n Tizi !

775
Exif_JPEG_420
- PUBLICITÉ -

xas ulamma ddeqs n ttawilat atraren i tesɛa Taddart-a, am La fibre obtique, aman deg yiḍ eg wass, ulac aɣbel n trisiti s umata, axxam n usejji, lgaz n temdint, meɛna ad naf, iseggassen-agi ineggura, ayen din d asenfar yeqqim akken deg tlemmast n ubrid : ur usellek, ur iban ubrid-is.

- PUBLICITÉ -

Tala Athmane gar tudrin timeqranin n tɣiwant n Tizi Uzzu. Tezga-d ɣer usamar-is, tebɛed fell-as s wazal n 15 n yikilumitren. Tesɛa tilisa akked tɣiwant n Ait Aissa Mimoun ɣer umalu, asif n Sebaou ɣer unẓul, ma deg ugafa, ad naf taɣiwant n Ouaguenoun. Xas ulamma akal n taddart-agi yenṭeḍ ɣer tɣiwanin n Ait Aissa Mimoun d Ouaguenoun, meɛna taddart tetabaɛ taɣiwant n Tizi Uzzu imi s lgirra-nni i teqqen ɣer uḍwar n Isyakhen Umeddour i yellan deg tɣiwant n Tizi Uzzu. Dɣa, tkemmel kan akken.

Takerḍa n Tala Athmane

Zedɣen deg taddart n Tala Athmane ugar n 10 000 n yimezdaɣ. Tettwassen aṭas, tineggura-a, s leswaq-is : ama d win win n lǧemɛa neɣ n larebɛa i d-yezgan berra n taddart deg umekkan iwumi qqaren Lbur n Wadda neɣ Agni n Tigit. Llant deg-s tlata n tliwa : Tala n wadda, lɛinṣer aqdim d lɛinṣer ajdid. Am wakken llan aṭas n yiɣbula iwumi qqaren tiɛwinin. Llan s umata, tlata n yiḍwaren n tnezduɣt : Tazmalt n wadda, taddart ufella akked Lexmis alemmas. Taggar-a, yerna-d Yiɣil Ufella. Tella zik,taddart n Tala Athmane d amedya i tudrin n tmurt n leqbayel seg wakken teṭṭef deg wansayen-is akked tneṣlit-is. Ɣef wakken i aɣ-d-nnan ula d Si Muḥend U Mḥend icekker-itt-id deg yiwen usefru imi ala deg Tala Athmane i t-kubren akken ilaq asmi i d-iɛedda syin. Yekka-d seg Tamda d abrid ɣer Yisyakhen. Asefru-a, mazal deg yimawen n yimezdaɣ. Ha-t-an amek i as-yeqqar :

Ɛeddaɣ-d deg yiwen ubilaj messus,

Yezzi-as kalitus,

Winna, qqaren-as Tamda.

Lmakla-nsen d akermus,

D aseqcer s ufus,

Laẓ dinna i yesqaqa.

Lxetyar ɣef lxetyar, d Tala Athmane,

ṭṭɛam-nsen d aḥlawan,

s wudi i yeddahan.

Mačči am Wat Yisyaxen,

S lqahwa i ɛerḍen,

Ziɣ yella inebgi n waman.

Isenfaren deg yir addad

Akken yebɣu yili lḥal, u xas ulamma ddeqs n ttawilat atraren i tesɛa Taddart-a, am La fibre obtique, aman deg yiḍ eg wass, ulac aɣbel n trisiti s umata, axxam n usejji, lgaz n temdint, meɛna ad naf, iseggassen-agi ineggura, ayen din d asenfar yeqqim akken deg tlemmast n ubrid : ur usellek, ur iban ubrid-is. Dɣa ɣef yisenfaren-agi i yesɛan leɛḍil, ad d-nbder lbusṭa i iɣelqen acḥal-aya tura d aseggas. Niqal, bdan sseqɛaden deg-s, yuɣal yeḍḥa-d wugur eg ureqqeɛ-is imi ɣef leḥsab n yimussnawen n lebni, ilaq ad iɛiwed lbenyan seg s wadda.

Aya yeǧǧa lecɣal ad ḥebsen alamma rnan-d tadrimt i as-ilaqen. Ussan ineggura, yettwajerred ukemmel n usenfar-a, acu kan lecɣal, ṭṭillin-d ur d-keccmen. Teqqim akken lbusṭa deg yir liḥala. Tamsalt-agi n leɛḍil, teɛna ula d annar n ddabex uḍar, s umata. Bdan lxedma n uṣeggem deg-s acḥal-aya d aseggas, mazal ar tura tettezzi tettenneḍ temsalt deg unnar ɣef  ssebba n tedrimt ur d-newwiḍ ɣer tkebbaniyin i yeṭṭfen asenfar. Tkemmel yecbek wugur imi ula d wid yettnadin ɣef tefrat-is deg taddart, ur ddukklen aragar-asen, ftutsen d igrawen, ama taseqqamut n taddart, ama d ufrinen neɣ tiddukkliwen n waddal. Yal wa ijebbed ɣer tama-as,d ayen i yeseqqsen deg wafud-nsen, u yefka lǧehd i yimḍebbren i ikemmlen deg usɛẓẓeg-nsen.

‘’I wakken ad tefru temsalt-a, ilaq ad ɛiwden yimezdaɣ taseqqamut n taddart imi ala aselway i d-yeqqimen weḥd-s. Syin, ad sduklen iɣallen-nsen u ad kkren s wadda i yisenfaren-a. Ma teqqim akka, ulac leslak, ulac tifrat : ad yeqqim leɛḍil ilebda’’. Wagi d awal n yiwen n umezdaɣ n taddart n Tala Ɛetman. Zyada ɣef sin n yisenfaren-agi, ad naf aman yeqqersen deg yal tama, lmejra deg yal abrid mi ara d-ɣlin yiḥemmalen. Tasebbalt n waman yettenfalen yal ass, anda ttruḥun waman d iḥemmalen deg yiqudas n waman yumsen…atg. ‘’Mazal u mazal isenfaren-nniḍen i nebɣa ad nṣeggem, am uxxam n usejji, axxam n yilmeẓyen, taneḍfart n tɣiwant, tamkerḍidt, abraḥ…’’, ikemmel yenna deg wawal-is M.A.

Hocine Moula

- PUBLICITÉ -